Go Back   Sudan.Net Discussion Board - SDB - منتدى سودان.نت > General Discussion Board > General Discussion - المنتدى العام

    

Reply
 
Thread Tools Display Modes
Old 19-Dec-19, 16:34   #1
tikaina
Golden Member
 
tikaina's Avatar
 

Join Date: Jul 2004
Posts: 8,496
Default شوقى بدرى يسلخ الصادق سلخ من امو




تتذكر يا الصادق

تصريح الصادق المهدى الاخير بان تقديم البشير الى محاكمه سيسبب فى سيل الدماء فى الخرطوم حير القريب قبل البعيد . هل المقصود هو تخويف الناس . انت نسيت يا الصادق الدماء السالت فى دارفور ودى دماء اهلك وجدودك . وكان معاها اغتصاب وحرق وترويع . وكمان نسيت تكلمنا دماء منو الحتسيل فى الخرطوم . ومنو الحيتسبب فى اساله الدماء .
انت يا الصادق ما ود امدرمان مفروض تكون بتنزل عكس . كيف يقدروا يغشوك . اولاد الاقاليم . زمان بتاعين الملوص والثلاثه ورقات بيصطادوا الاغراب . وبعرفوا اولاد امدرمان بالشكل , بتجنبوهم . ليه تخلى الانقاذ تبيع ليك الترماج . هل معقول تكون صدقته انه الناس ديل لمن جوك فى البيت واشادوا بيك وعملوا ليك الاشعار والاوراد انهم كانوا جادين . توافق شنو يا الصادق . قالوا الجرب المجرب حاقت بيهو الندامه. ناس الانقاذ كان عارفينها حتطلع ملوص بس الغريبه انت ما كنت عارف يعنى عيال الانقاذ ديل طلعوا اشطر من ود امدرمان . انت نسيت يا الصادق الاهانات والاتهامات الوجهوها ليك لمن قبضوك وزلوك وسجنوك .

تهانينا بعيد ميلادك الثلاثه وسبعين . لكن انت نسيت انه العمر ما فضل فيه كثير . وانك بتعيد كثير من الغلطات وتلدغ من نفس الجحر عشرين مره . نسيت لمن فى اكتوبر 64 لمن قدام اللورى الشايل جنازه القرشى انو الترابى كان واقف جمبك ومتقوى بيك وقال للناس امشوا اتوزعوا وانحنا حنتولى الموضوع ده من هنى . وكادت اكتوبر ان تفشل لان الترابى كان يريد لها ان تفشل . الى ان قيد الله لاكتوبر المحامى بشير الطيب والذى هتف الى الجحيم يا عبود وانطلقت اكتوبر التى كنت انت والترابى على وشك ان تجهضوها .
نسيت يا الصادق يا اخوى لمن الناس طلبوا من بابكر عوض الله يترأس حكومه اكتوبر ورفض . واتصلوا تلفونيا بشداد ورفض ما دام عبود لا يزال على رأس الدوله . واقترحتم انتم السر لانه رجل ضعيف ويمكن قيادته . وبعد شهور طلبتم من السر ان يستقيل . حتى تنهار اكتوبر . وبالرغم من مناشده الوطنيين اصر السر على الاستقاله . حتى ان الاستاذ شوقى ملاسى اضطر على ان يبصق على وجه السر امام الجميع .
ثم اتت الديمقراطيه وكنتم ترفضون محاكمه عبود ورجاله . اين كنت يا الصادق عندما ذبحوا الديمراطيه وقرروا طرد الحزب الشيوعى . نسيت انه ربنا ما فتح عليك باى كلمه بادانه هذا التصرف الغير ديمقراطى . وخليت على عبد الله يعقوب يغشك .
نسيت يا الصادق لمن عمك احمد استعمل عكازه واعتدى على نائب برلمانى بالعكاز فى داخل البرلمان. واحمد وزير داخليه لانه النائب كان من جماعتك . ولمن عمك صادر المطبعه التجاريه وقالوا ليهو ده اجراء غير قانونى والمطبعه دى ما بتاعه الحزب الشيوعى , بتاعه شخص وبأسمه وعمك قال حأصادرها وخلى اى ابن ...... يجى يتكلم . انت كنت وين يا الصادق ؟. ولا نسيت . ياتوا ديمقراطيه دى البصادروا فيها المطابع ؟ .

ياتو دم يا الصادق الانت خايف عليهو ؟. الالف دينكاوى جنوبى القتلوهم فى الضعين وانت فى الحكومه ديل ما كانوا سودانيين . وبلدوا وعشارى كتبوا ليك بالحرف وادوك اسامى المجرمين واوصافهم . نسيت يا الصادق انك ما عملته حاجه ؟ . وبعد ما بلدوا خله البلد انت ختيت البروفسور عشارى فى السجن والانقاذ جات لقتوا بايت فى السجن . ورسلته ليهوا الفاتح سليمان مدير الدائره وهددتوهو ورغبتوهو الا انه رفض . نسيت يا الصادق ولا شنو . نسيت يا الصادق ان البطل جون قال ليك فى مفاوضات السلام المليشيات البتسلحوا فيها دى , جندوها وادوهم نمر وذى عسكرى . وخلوهم يحاربونى . لانه اذا وصلنا الى سلام او اى اتفاق بيكون كويس . لكن بالطريقه دى نحنا بعدين ما حنقدر نجمع السلاح ده من ايد الناس . ودلوقت يا الصادق السلاح الماتوا بيهو الفلاته والهبانيه ده امتداد للسلاح الانت كنت بتسلح بيهو المراحيل وبقيه قبائل الالتماس لمحاربه قرنق والحركه الشعبيه .السلاح ده ما تسبب فى النهب المسلح وحل النزاعات بالسلاح . وهذه بدايه مشاكل دارفور ولا ما متذكر يا الصادق . انت وقتين ما عاوز الدماء تسيل ليه ما حاكمت مجرمين مجازر الضعين ومجرمى اكتوبر . ولماذا سلحت المليشيات . انت نسيت يا الصادق لمن عمر نور الدائم رحمه الله عليه كان بيقول البلد بلدنا ونحنا سيادها والبتكلم حنضربوا بمليشياتنا فى الديمقراطيه الاخيره . نسيت يا الصادق لمن انت وعمك احمد راكبين الحصين من القبه وعلى شارع الاربعين فى 53 قبل ما يترصف وبتهتفوا البلد بلدنا ونحنا سيادها . هل دى كانت دعوه لحراره , ولا دواس .

لمن دكتور خليل جاء امدرمان ليه انت ادنت مسيرتو مع انه نفس الناس ديل انت جبتهم قبل كده بتسليح هزيل وبتجهيزات ضعيفه وكما قال رجال المدرعات دسناهم بالدبابات وفجخناهم . هل ده كان حقن دماء او خوف من سيل الدماء . مبارك قال انت قبضته وحتنفذ سياسه الانقاذ . وقالوا اطعم الفم تختشى العين . الصادق هنالك البعض الذى لا يزال يثق بك ويتمنى لك الخير , فأقل شئ ياخى اسكت عليك الله . انا احد اللذين قررت ان لا اتعرض لك لكن كمان يا الصادق انت ما بتدينا فرصه , القلته ليك ده شئ بسيط من لسته طويله . والناس لمن بنزلوا الناس المعاش فى سن الستين او الخمسه وستين لانه الانسان عنده مقدره معينه لفتره معينه . انا اصغر منك بمجموعه من السنين تكتب برقمين وافتكر ان جيلى فات عليه الفوات وانه من المفروض ان نترك الصغار يقررون لان هذه حياتهم ومستقبلهم . انت نسيت يا الصادق ان الانسان بنزل المعاش فيما عدا البابا وانت مش بابا ياخ ولا شنو ؟..

ع.س. شوقى



__________________

✌تسقط تالت

tikaina is offline               Reply With Quote               
Sponsored Links
Old 20-Dec-19, 08:14   #2
ودالعفاض
Crown Member
 
ودالعفاض's Avatar
 

Join Date: Aug 2007
Location: الحصاية ـ العفاض
Posts: 12,550
Default

مقال جميل
الصادق المهدي أجاد سياسة : كراع هنا وكراع هناك
حتي يستفيد من كل المواقف والظروف
وأقولها لك كلمة : إذا فشلت القوي الحديثة او الواعيه او سمها ما شئيت
في إزاحة بيتي المهدي والميرغني عن لعب ادوارهم التقليدية الباهتة
فلن تقوم للسودان قائمة وسوف نعود الي نقطة الصفر ولو بعد حين
__________________
...(ام ابرموا امرا فانا مبرمون)
من كرمت عليه نفسه هانت عليه شهوته
ودالعفاض is offline               Reply With Quote               
Old 28-Dec-19, 06:32   #3
tikaina
Golden Member
 
tikaina's Avatar
 

Join Date: Jul 2004
Posts: 8,496
Default

Quote:
Originally Posted by ودالعفاض View Post
مقال جميل
الصادق المهدي أجاد سياسة : كراع هنا وكراع هناك
حتي يستفيد من كل المواقف والظروف
وأقولها لك كلمة : إذا فشلت القوي الحديثة او الواعيه او سمها ما شئيت
في إزاحة بيتي المهدي والميرغني عن لعب ادوارهم التقليدية الباهتة
فلن تقوم للسودان قائمة وسوف نعود الي نقطة الصفر ولو بعد حين


تعال شوف الانصرافى قال شنو لى مريومة لمن جات راكبة الحصان

ههههه

اول مرة ..
" اشوف حمار راكب حصان " .
مريم الصادق تطالب اردوغان بالاعتزار عن مآسي الدولة العثمانية .
اقسم بالله يا مريم .. دا ما كلامك .. دا كلام زول محنن دقنو ولابس "على الله" وماسك ليهو كتاب وقاعد في ندوة يبرطم .
القال ليك كدا ابوك صاح .. الواحد ماعايز يسب ليك ويسب لابوك من الصباح لانو معانا ضيوف .
آل المهدي .. جنكم هبل واستعراض ونظرية شيفونية .. ياخ دا اول رئيس تركي يزور السودان من اخر رئيس كفت جدك .. عايزة تعملى لينا شوشرة وقلة ادب .. قاعد ليهو 15 سنة في تركيا مالك مافتحتي بلاعتك وقلتي ليهو اعتزر لينا .. بعدين لانك قادة تاريخ الضفركم الخديوي المصري ما الاستانة التركية .
على سيرة الجدود والحصين .. انت جدك قال انا المهدي المنتظر وهو ياكافي البلا لحدى ما مات ماعمل ليهو عمرة واحدة ولحدى ما مات ما شاف قبر النبي ومش كدا كمان قال هو من آل البيت .. والله الا يكون من آل البيت بتاع الغداء الفى بري محطة اربعة .
احنا الشعب السوداني .. بنطالب جدك المهدي بالاعتزار .. لانو جاب لينا احفاد عواليق زيك .. يعني طرد الانجليز عشان يجيب لينا نوعك دا انتي واخوك الكرور المرمي في القصر وللا ابوك .. المعطنا بالديموقراطية والحرية وهلم جرا وما استفدنا منو حاجة .. اللهم الا الدعاية البعملها لمصانع الحنة والمحلبية .
قومي شوفي ليك ندوة وللا حلة بطاطس وفكينا من خلقتك دي بلا قرف معاك

__________________

✌تسقط تالت

tikaina is offline               Reply With Quote               
Old 28-Dec-19, 08:01   #4
Wad Ibrahim
Golden Member
 
Wad Ibrahim's Avatar
 

Join Date: Mar 2009
Posts: 8,410
Default

Quote:
Originally Posted by tikaina View Post


تعال شوف الانصرافى قال شنو لى مريومة لمن جات راكبة الحصان

ههههه

اول مرة ..
" اشوف حمار راكب حصان " .
مريم الصادق تطالب اردوغان بالاعتزار عن مآسي الدولة العثمانية .
اقسم بالله يا مريم .. دا ما كلامك .. دا كلام زول محنن دقنو ولابس "على الله" وماسك ليهو كتاب وقاعد في ندوة يبرطم .

الإمامة مريومة تلبس العمامة وتمتطي الجواد
أيمن تيكنو يا حسود هسي أخير الواحدة تركب حصان ولا العكس
نحن في عهد الحرية .. مسموح للمرأة أن تركب كل ما تراه مناسباً من الدواب والمركبات
وأذكرك بباعات اللبن وركوب الحمير.

__________________
اللهم زد من يحبني جنونا بي 00
وامنح من يكرهني نعمة العقل 00

To view links or images in signatures your post count must be 10 or greater. You currently have 0 posts.
Wad Ibrahim is offline               Reply With Quote               
Old 16-Jan-20, 19:24   #5
tikaina
Golden Member
 
tikaina's Avatar
 

Join Date: Jul 2004
Posts: 8,496
Default



الصادق معذور .. ما عذركم يا اهل السودان ؟ .. بقلم: شوقي بدري
التفاصيل
نشر بتاريخ: 15 كانون2/يناير 2020
الزيارات: 523

لم يضر سياسي في نصف القرن الماضي بالسودان مثل الصادق . ولا يزال البعض يتوقع منه خيرا . لقد كتبت ووضحت ان الصادق مصاب بالاعتلال النفسي ، فهو سايكوبات . السايكوبات لا تهمه سوي نفسه ملذاته وشهواته . انه اناني يكذب ، يعد ويعرف انه لن يوفي بوعده . يغطي على كل هذا بالكلام المنمق والوعود المعسولة ويكذب بلا تردد . فلترجع الى التفسير العلمي للمعتل نفسيا .
اقتباس

شخصية معتلة نفسيًا ويسمى أيضًا بالسيكوبات ] (بالإنجليزية: Psychopathy) هي باختصار أكثر الشخصيات تعقيداً وصعوبة في التعرف على صاحبها، حيث أن المعتل نفسياً يجيد تمثيل دور إنسان عاقل كما أن لهُ القدرة في التأثير بالآخرين والتلاعب بأفكارهم، ويتلذذ بإلحاق الأذى بمن هم في محيطهِ وخاصة إذا ما كان زوجاً أو زوجة، وهو عذب الكلام، يعطي وعوداً كثيرة، ولا يفي منها بشيء؛ عند مقابلته ربما تبهرك لطافته وقدرته على استيعاب من أمامه بمرونته في التعامل وشهامته الظاهرية المؤقتة ووعوده البراقة؛ ولكن حين تعامله لفترة كافية أو تتحرى حوله من أحد مقربيه عن تاريخهِ تجد حياته شديدة الاضطراب ومليئة بتجارب الفشل والتخبط والأفعال اللا أخلاقية. المعتل نفسياً غالباً ما يكون مُستغلاً للمرأة بكل صور الاستغلال جسدياً ومادياً، وكثير الوعود قليل التنفيذ لها، ويكثر الكذب، وقد يصل سلوكه إلى إرتكاب جرائم ومنها جرائم جنائية في الحالات المُضطربة.
كثيرا ما يتعهد ويعد ويخلف، هي شخصية لا يهمها إلا نفسها وملذاتها فقط وتشعر بأنها محور الكون، وبعضهم ينتهي بهِ الأمر إلى السجون وبعضهم يصل أحياناً إلى أدوار قيادية في المجتمع نظراً لأنانيتهم المفرطة وطموحهم المحطِّم لكل القيم والعقبات والتقاليد والصداقات في سبيل الوصول لمرادهِ، هذا الشخص هو من انعدم الضمير لديه فولع بالأنا (الهو) الشهوانية حسب أفكار فرويد، ونفى الضمير (الأنا العليا) ، فهو لا يحمل في طياتهِ كثيراً من الأخلاقيات أو العرف من الدين أو الضمير أو أي حسيب، وبالتالي فإن مؤشر المحصلة سوف يكون دائماً في حالة من الميل المستمر نحو الغرائز ونحو تحقيق ما تصبو إليهِ النفس وحتى دون الشعور بالذنب أو التأنيب الإنساني إذا ما وقع في منطقة الخطأ ويرى الاطباء أن 25% من المجرمين والمخالفين هما نتاج الشخصية السيكوباتية، والإحصائات العلمية توضح أن من نصف بالمائة إلى واحد بالمائة من سكان العالم يحملون صفات وجينات وراثية تؤدي إلى السيكوباتية، وتختلف درجة وشدة الاعتلال النفسي في الاشخاص المصابين حسب درجة ذكاء الشخص والبيئة والتعليم.
نهاية افتباس
هنالك تحليلات في مواقع كثيرة للسايكوبات يمكن قوقلتها وتنطبق على الصادق وتصرفاته الغريبة . ولهذا اعتبره معذورا ، لانه لا يستطيع ان يتصرف بعيدا عن حالته النفسية . والوم الناس الذين لا يزالون يتوقعون منه خيرا . الغريبة ان البروفسر قاسم بدري متخصص في علم النفس . لماذا فات عليه ان الصادق الذي يتبعه قاسم هو معتل نفسيا ، فيقدم له المساعدة .
في موضوع عنوانه تربية العقارب والدبايب تكلمت عن البروفسر مالك بدري العلامة في العلم النفسي وله كتب بالعربية والانجليزية بعضها في مكتبة الكونقرس الامريكي كان يقوم بعملية غسل مخ للاطفال في نادي الاخوان المسلمين في شارع الوادي الهجرة . كان يدربهم على الجمباظ ويقول لهم .... المسلم القوي خير من المسلم الضعيف . ويتعرضون مثل اطفال الفاشية ،النازية ، القاعدة داعش الخ لغسل المخ . ومن هؤلاء الاطفال في سن العاشرة خرج عقارب ودبايب الكيزان وكان معه يس عمر الامام وآخرون في ذلك النادي ومعهم مصريون مثل مصطفي وجمال من اداروا اول محل مرطبات اسمه خيرات كان قبلة الناس وصارت لهم فروع وتجارة في كل السودان . وفي ذلك النادي خطب القرضاوي عن معركة المسلمين في الجهاد ضد الاستعمار الفرنسي في الجزائر . وهذه الجريمة يسأل عنها عمي مالك بدري . واعتذاره لى بعد كتابة الموضوع عن طريق الايميل .... هو انه قد تغير وصار صوفيا بعد ان ترك الكيزان . ولكن علية ان يعتذر للشعب السوداني واهل الاطفال الذي جنى عليهم ، وهذه الجريمة لا تسقط بالتقادم .
انا لا الوم الصادق فهو رجل معذور ولكن الوم في المكان الاول اهلى من آل بدري وبقية الاغنام الذين يتبعون الصادق .
الصادق لم يعش طفولة عادية . ولهذا ليس له اصدقاء حقيقيين يحبونه لشخصه ويحبهم ويكون على استعداد للتضحية من اجلهم ينصحونه ويقيمون عثرته . الصادق لا يستمع الا للصادق ، لانه يعتبر نفسه فوق النقد . الصادق عرف فقط الخدم الحشم والاتباع الذين يقبلون يده ويد اهله .
الصادق زامل الكثيرين في مدرسة الاحفاد منهم المشاهير مثل الرجل صادق التدين ، الرياضي والفنان شرحبيل احمد ، الشاعر ورجل الاعمال على دفع الله شبيكة ، المناضل انور زاهر سرور الساداتي عمر ابراهيم بدري وعشرات التلاميذ . جاور في العباسية مئات الاطفال والشباب منهم خضر فرج الله ، النعيم فرج الله والد العسكري المغدور نزار النعيم ، ابراهيم فرج الله الدكتور صلاح فرج الله وبقية الاسرة وهم اولاد بنات الوالدة رحمة الخيريعود اخوته واخوان الصادق في الرضاعة ، لم يكون علاقة حميمة مع احدهم ، لانه لا تهمه سوي نفسه . يستحيل في العباسية ان لا يكون للانسان عشرات الاصدقاء .
الصادق هو الشخص الوحيد الذي ولد في امدرمان وليس له اصدقاء !!!! بالرغم من حيشان اسرته سكن ودرس في مدرسة كمبوني الداخبية التي يسكن فيها من لا اهل له في العاصمة . وكانت غرفته في الطابق الثاني ولها بلكونه على الجزء الشرقي ..... كان الامر يدعو للدهشة ، لم يكون صداقات بالرغم من حياة الداخلية التي تربط بين الناس . مثل علاقة دريج ، شوقي ملاسي ، النميري ، الترابي ، نقد ، كشكوش ، اللواء مبارك رحمة ، على عثمان محجوب ، المحافظ التجاني محمد التجاني الخ بالرغم من اختلافهم كان هنالك رابط بينهم جميعا ، فنقد الذي سجنه الترابي ذهب لتهنئة الترابي عند خروجه من سجن البشير . اتحدي من يأتيني باسم شخص واحد يقول انه كان فرده الصادق!
ارسل الصادق الى مصر وكلية فكتوريا مثل ابناء المصارين البيض وكان المسؤول منه ابن الانصار اللواء البنا . وعندما شاهد اللواء الصادق يقف امام المرآة ويخطب في جماهير وهمية حذره وطالبه بالاهتمام بدروسه . وعندما لم يرعوي الصادق كانت بسطونة اللواء الذي اشتهر بالصرامة والانضباط الشديد . ولا يزال الصادق يخطب ويتكلم والمساكين يهللون .
سألت بعض العقلاء كيف ينساقون للمراغنة ، كما سألت من احب واحترم من حملة الشهادات الشحمانة لماذا ينقادون للطائفية ؟ ردهم كان .... عقليا كدة انحنا ما مقتنعين لكن قمنا على كدة وما قادرين نتفكا .
كنت اتألم عندما بقول لى من احب واحترم وله طفل معاق بسبب زواج الاقارب وهذه الظاهرة يعاني منها شقيقه وبعض اهله .... نعمل شنوا دي عاداتنا . ونحن في شمال السودان من اكثر الدول التي ينتشر فيها زواج اقرب الاقارب ويتفوق علينا الباكستانين الذين يعانون من تخلف واعاقة الاطفال وبكثرة . لماذا لانتعلم من الدينكا مثلا الذين لا يتزوجون مثلا من بنات حلتهم ناهيك عن بنات عمومتهم ، لانهن بمثابة شقيقاتهم . والنبي صلى الله عليه وسلم قال انكحوا في الاغراب . لماذا يصرف شخص عاقل ماله القليل في السجاير ويحرم اطفاله . يسعل حتى تدمع عيناه بسبب الدخان ولا يتوقف من التدخين ويقول .... انا عارف السجاير ده حيكتلني ومكمل قروشي لكن ما قادر اخليه .... بالنسبة لى هذا يشبه التمسك بالطائفية يعرفون انها سيئة ولكن لا يستطيعون تركها لانها اصبحت بالنسبة لهم اسما وهوية .
رجع الصادق من كلية فكتوريا غاضبا للسودان وسكن عند الشيخ السراج وتعلم البلاغة واللغة العربية والدين الاسلامي . وكان الشيخ السراج مهووسا بالعروبة والاسلام ويطلق شعره ، يحمل سيفا ويركب فرسا مثل فرسان العرب . قفز في يوم من الايام بفرسه على معدية شمبات وعندما احتج الناس قال ..... اعلمه القفز على الاساطيل .
الشيخ السراج كان متزوجا من والدة الصادق على سنة الله ورسوله كمحلل بعد الطلاق الثالث من الصديق المهدي . وعادت والدة الصادق الى الصديق بعد تعرض الشيخ السراج للتهديد . والصادق كان له ارتباط قوي باستاذه الشيخ السراج , ومن المؤكد انه قد تأثر عندما تم قتل الشيخ السراج وتم تقطيعه بطريقة ان الطبيب الشرعي قد قال ان من قام بتقطيعه لا بد ان يكون جزارا . وتم القبض على محمد مصطفى الجاك على ما اذكر صهر حديد السراج وهو جزار واطلق سراحه بعد اسبوعين بسبب عدم توفر الادلة .
ماتت القضية والمتحري كان حسن بخيت ، صول البوليس وقتها كان قريبه الصول نصر الذي صار مالكا لعشرات المنازل المتلاصقة في الثورة . يسكن في احدها الصحفي كمال حسن بخيت وزوجته ابنة الصول نصر .لم يكن مسموحا للمواطن حيازة اكثر من قطعة واحدة في الثورة التي وزعت لاهل امدرمان بسعر اسمي 30 جنيه .
تلقي الصادق تعليمه على ايدي مدرسين خصوصيين وجلس للشهادة من منازلهم . ثم التحق بجامعة الخرطوم كمنتسب . اصطدم بمسجل جامعة الخرطوم العالم الاديب والسفير جمال محمد احمد عم المغدور مجدي له الرحمة . الصادق لم يكن قد اكمل الثامنة عشر الا انه كان يأتي قائدا سيارة الى الجامعة وهذا يعارض القانون الذي يحدد عمر سائق السيارة ب18 سنة . رسالة الاديب جمال محمد احمد للصادق ...... في اولاد بجو الجامعة دي ما عندهم قرش الطرماج ، في الجامعة دي يا انت يا العربية . ترك الصادق الجامعة وذهب الى بريطانيا .
عاد الصادق وتقلد المناصب . وهو في العشرينات صار رئيسا لحزب الامة الذي به الفطاحلة امثال عبد الله خليل محمد صالح الشنقيطي العم ابراهيم احمد ، الاستاذ عبد الرحمن على طه الامير نقد الله ، محمد احمد المحجوب الخ وبكل نرجسية وعقدة السايكوبات ما ان بلغ الثلاثين بالشوكة والشنكار حتى طالب بحكم السودان . وبدلا من الترشح في مكان ميلاده امدرمان تم ارسال الاعمام محمد الحلو وعبد الرحمن النور عم البروفسر المناضل اسامة ابراهيم النور الى الرجل العظيم بشرى حامد نائب الجبلين والذي فاز بطريقة كاسحة لانه تحصل على اكثر من 80 % من الاصوات لانه يعرف اهل المنطقة بالاسم واسماء الآباء والاطفال . وهو من بيت المهدي لأن حامد هو اخ المهدي واستشهد في قدير كل هذا يجعله اجدر من الصادق . هذا اذا نسينا العمر والتجربة . كما طلب من احمد عبد الله جاد الله خال الصادق التنازل لاحمد المهدي . محن .
اضطر العم بشرى حامد للتنازل بعد ان وعد الصادق بانه سيحفر الآبار الارتوازية التي وعد بها بشرى حامد ويبني مستشفى الجبلين الخ . ويتم دفع 100 جنيه شهريا للعم بشرى حامد لبقية الفترة البرلمانية لان العم بشري حامد قد اشتري من السيد عبد العال شركة السهم الذهبي سيارة تويوتا بالاقصاط . وطلب شراء قطعة أرض لعدم وجود مسكن للعم بشرى حامد في امدرمان . وعد الصادق ولم بنفذ كعادته . الصادق لا يفي بوعده لعمة ، اتريدونه ان يفي بوعدة للآخرين ؟ وطالب مباشرة بطرد الشخصية العالمية المحجوب لكي يصير هو حاكم السودان .
اورد الصحفي عبد الرحمن مختار ابن الانصار وجده ود سالة امام جامع الجزيرة ابا في كتابه خريف الفرح .... ان المرضي قطب الحزب الاتحادي قد طلب مقابلة الصادق بعد منتصف الليل في منزل محمد الخليفة شريف وقال للصادق انا عندي دين كبير لوالدك وعاوز ادفع الدين ده ليك انت . انت دلوكت عاوز تتحالف مع حزبنا . وانا بقول ليك انت ما قدر الازهري . الازهري بيلوي ايد اقوى زول ، خليك مع عمك . ورفض الصادق. شق حزب الامة فركش بيت المهدي ، لانه سايكوبات لا يهمه حريق السودان وغير السودان تهمه فقط نفسه . ذهب له اخي الصحفي الفاتح محمد التجاني سلوم طيب الله ثراه مع الصحفي الاستاذ محمد سعيد محمد الحسن وحذروه من انقلاب مايو الذي صار واضحا . الا ان الصادق لم يهتم لانه كان غاضبا بسبب طرده ونوابه من البرلمان وكانوا يجتمعون تحت الشجرة . كان يحقد على المحجوب لانه كان نجما عالميا ملئ العين والسمع . الصادق لا يحب الرجال الاقوياء انظروا لمن حوله !
من كانوا يحسبون انني احتد واظلم الصادق صاروا يتصلون ويعتذرون لانهم ،، بعد الدحيش ما اكل العيش ،، قد عرفوا انه لا خير في الصادق . وشتم الصادق من لم يقبل اعتذار ابنه عبد الرحمن ...... اول مرة نسمع باعتذار مشروط ويرفض رفضه . وقال الصادق قبل سنوات ..... والماعاجبو الباب يفوت جمل وبوخة المرقة وكركار الرقدة . واخيرا توج كل هذا بمافي كاني وماني . وهذا تصرف اطفال ناهيك عن الامام المفكر ،الكاتب ، المجدد والمنقذ الخ .
اذكر انني قد كتبت بعد مايو ان الصادق كان كثير الحركة والكلام وقلت ان حاله ذي الزول الحارس لبن في النار ، ما قادر يصبر . وخايف علية كان غفل يفور ويدفق .
الصادق لا يقدر ان يرى الآخرين على رأس اى شيئ حتى ولو راس بيت بيزبلوا فيه . عند تكوين حكومة اكتوبر ضغطوا على سر الختم الخليفة للاستقالة بعد ستة اشهر . و السر شخص ضعيف استقال وهيص الصادق والبقية . بعد مايو حدث نفس الشيئ . وليست هنالك قوة في الارض تجعل الصادق يتمتى الخير لهذه الحكومة طالما هو ليس على رأسها .
ونحن في الاولية في سنة 1953 كان الصادق وقتها في الثامنة عشر من عمره كان يركب حصانا مع عمه احمد المهدي ويسيرون في شارع الاربعين الذي لم يكن مرصوفا وهم يهتفون .... البلد بلدنا وانحنا اسيادا . وهذا يعني ان الآخرين لا شيئ . الهتاف الصحيح كما كتبت ردا على عمر نورالدائم الذي كان يقول البلد بلدنا وانحنا سيادا والبتكلم بنضربوا بمليشيات الانصار وما حنسلمها الا للمسيح الدجال. ولقد سلموها للترابي الدجال . الهتافالصحيح هو .... البلد بلدنا وانحنا خداما . ليس هنالك سادة وغير سادة .
كل انسان في السودان يدفع ضريبة دخل زكاة ورسوم . انا هنا اتحدي المراغنة وآل المهدي لكي يظهروا ضرائبهم ورسومهم التي تدفعها حتى ستات الشاي الخ.
ان الصادق بسبب نرجسيته على استعداد لان يدوس على كرامته ويحالف حميدتي الذي اهانه ورمى به في السجن وقال مافي مجمجة الخ . لقد ادى القسم وانضم الى نميري والناصريين الذين قتلوا اهله وسفكوا دم الانصار في ود نوباوي والجزيرة ابا . كل هذا لانه لا تهمه سوي نفسه . انا لا الوم الصادق فهو معذور ولكن الوم من يتبعونه
كستبان
لمن حميدتي رمى الصادق في السجن لماذا لم نسمع كاني ماني ؟؟

__________________

✌تسقط تالت

tikaina is offline               Reply With Quote               
Reply

Bookmarks

Thread Tools
Display Modes

Posting Rules
You may not post new threads
You may not post replies
You may not post attachments
You may not edit your posts

BB code is On
Smilies are On
[IMG] code is On
HTML code is Off

Forum Jump

بحث مخصص

All times are GMT. The time now is 09:45.


Sudan.Net © 2014