Go Back   Sudan.Net Discussion Board - SDB - منتدى سودان.نت > General Discussion Board > General Discussion - المنتدى العام

    

Reply
 
Thread Tools Display Modes
Old 18-Jun-20, 10:55   #1
عبدالماجد موسى
Intermediate Contributor
 
عبدالماجد موسى's Avatar
 

Join Date: Oct 2008
Location: بريطانيا
Posts: 181
Default كسلا ليك الشجن قاشابي

حذفت شنو ؟
سألتني ست الريد برسالة نصية
مجدوعة بي حنية في الواتساب
ووقتا كنت أتقلب في بحر الشوق
واتلوى
واجرجر في الهوى التَّعَّاب
واشم قدح المنى الضوا
واشد غربة رسن سَحَّاب
عشان أحضن فيكي نفسي الهايمه عز الصيف
مغلغله بين مراسيكي ومراسي الطيف
وازرع فيك شتلة حنه تسند قيف
وابوس ايديك واتمغى
نسايم اللهفه عفو الريف
وَلَمَساتو
حذفت شنو؟ الشعور رَقَّ
رديت بكل جنون الشوق
وبَرَاحاتو
ولهيب الفرقه
طِقْطيق أصابع الحيره
شَد الصبر من جوه اختلاجاتو
شجن قاشابي
أنغام الحنين ذاتو
حذفت شنو؟
حذفت الترعه والختميه
وقبلها السوريبه
وبنيت غرب الجبل للسحاب ناطحات
وقعدت جنب القاش
ألاحق شمسنا الباسمه
التطل بالفرحه سَعَّاده
عيون المها السارحات
واعرج للسواقي اللوحه
مروج الشهقه متناثرات
حذفت شنو؟
حذفت عذابا غرب القاش
ست الإسم والساس
وست الراس
وكل الناس
وزرعت مدارس الأطفال
حدائق البهجه
وبنيت آمال
حذفت شوارع الآلام
وأحياء العطاشى الجد
مرابيع الشمس في النار
ضلامين مافي بينُم سد
زِيفَةْ هجير بَتَّار
واهديتم بيوت رويانه
صِحِيَّه
وطردت الجيفه والناموس
وخجيت كل زرايب السوس
وسديت هدامين الأمل في الناس
سراقين الفرح وصباحو
كسارين الشروق صوتين
الداسنو مفتاحو
والواقفين في نور العين
سَرَّاهُم المدسوس
ما اصغوا لجناحو
حذفت الحسره في بانت
ورديت ليها المطر هجعه وازدانت
ديكا سنيننا ما خانت
ولا لانت
حباب كسلا
الجمال في وريدا والشريان
ست الرموش الساجده
وَقَّادَة عشا الضيفان
حذفت شنو؟
حذفت الفتنه صباحي
من ضل الجميل مكرام
وهدّيت النفوس الطيبه
من بوم الشتا الهَدَّام
سليل الوحشه
شَتَّار الحروف والفال
الحالف يدفن الشينه
كَاشَاحْ السموم جَفَّال
الغَدَّاره بصماتو
وحذفت فيك يا كسلا
ليل الغول
وحذفت حلقاتو
ما المشتهيك بالطول
غرس الهوى وْوَزَّع شتول الفرحه
جاب العيد
تصفق فينا بسماتو
__________________
Pick up that human being

To view links or images in signatures your post count must be 10 or greater. You currently have 0 posts.
عبدالماجد موسى is offline               Reply With Quote               
Sponsored Links
Reply

Bookmarks

Thread Tools
Display Modes

Posting Rules
You may not post new threads
You may not post replies
You may not post attachments
You may not edit your posts

BB code is On
Smilies are On
[IMG] code is On
HTML code is Off

Forum Jump

بحث مخصص

All times are GMT. The time now is 12:48.


Sudan.Net © 2014