Go Back   Sudan.Net Discussion Board - SDB - منتدى سودان.نت > General Discussion Board > General Discussion - المنتدى العام

    

Reply
 
Thread Tools Display Modes
Old 20-Sep-19, 02:45   #1
tikaina
Golden Member
 
tikaina's Avatar
 

Join Date: Jul 2004
Posts: 8,496
Sudan Flag 🌷يا والدة اعفيلى وعدى القطعتو معاك🌷



اخونا الرائع محمد سيف صاحب المعلقة التى وعتها القلوب و زينت صفحات الميديا و عطرت حناجر الثائرين. كتبها ابان مذبحة 2013. احد لصوص النت نسبها الى نفسه فعاد الفارس محمد له الكرة بقصيدة أخرى فأسكت الله حسه و خرس لسانه و أحجم عن الظهور بعد أن كان يتباهى بما ادعى فى كل صولة و جولة.
اليكم القصيدتين.
و التحية للاستاذ المهندس محمد سيف.

إلى كُلّ أمهات الشّهداء يُغالِبن دموعهُنّ الغاليَة وهُنّ يزفُنّ أبنائهن إلى خُدورِ ‘ الحورِ العينِ ‘ مُخضّبيْنِ بِالمُسكِ ومحمِليْنِ بِالدّعواتِ الهاتِفةِ !!
إلى كُلّ أمهات المُعتقليْنِ يُثبِتن فلِذاتُ أكُبادهُنّ على الحُقِّ وراء القُضبانِ وفي مجاهيل الزنازين بُقول .. ماك الوَليد العاقّ .. لا خنت لا سرّاق !!
إلى أحرّارِ وطني و حرائِرهُ .. يقفون في وجهِ الرّصاصُ .. ويُعلِنون أن أن الرّصاصُ يُضاهي في عُرفِنا الرّقراق .. وأنّنا نحنُ أبنّاء الشّمسِ !!
م.محمد سيف 28 سبتمبر
يا والِدةً أعفيلي .. وعدتي القطعتو معاك ..
إنو الكِلام ممنوع .. في شلةٍ الياباك
ما تتفتّحُ سيَرةُ .. ما أخونُها في الأحلام
لا بِاللِّسانِ نُهتِّفُ .. لا تُكتِبُ الأقلام
أن شفت شيْنُ في يوْمِ .. أسكت وأتمسّكُ .. بي أضِعف الإسلام
إنّ جاك يوْمِ خاطِرِ .. تنضمُّ في وشِ الغوْل
أطرى البُيوتُ وأبوكِ .. خِت الصّغار قدّام
ما تُهينا عيشتنا .. باقيلنا فدِ هِدام
إنّ حدثك بالك .. إنّكِ تغيُّر يوْمِ في واقِعِ الأمة .. ما تسوُّقُك الأوهام
ديل مُجرِميْنِ ضمّةِ .. ما بيعرفوا الإسلام
بِتيَتُّمِ أوَلادّك .. ويَكوسوا فيكِ أعوّام
وأنا بِعمى يا يوسف .. ألقاهو ويْن هِدمِك .. شان نوَرُ عُيونيِ يعودُ .. ويَروحُ الإظلام
……..
يمّاي حديثك زيْن .. وأنا مِن وعيْتُ تحتكِ ..
ما خنت يوْمُ حُبكِ .. لا طاعتي ليكي كِلام
بس يمّةً دي بِفوْرِ .. لمّا البلد تغلي .. مليانة بالإجرام
لا لُقمة مِن دون ذِلِّ .. لا يوْمُ عُرفِنا سلام
يمّاي أعفيلي .. ما قادِرُ أتبّكُم .. أسكت وأُعايِنُ بس .. ما ربيَت على إستسلام
الرّوْح تروُّح يمّةٍ .. كتّل الحقيقةُ حرام
……..
لمّا العساكِر ديل .. الشوهو الإسلام
جايبين تفاهاتم .. سجّنونا بإسم الدّيِّن ..
حرّقونا بإسم الدّيِّن .. حقّرونا بإسم الدّيِّن ..
كتّلونا بإسم الدّيِّن .. الدّيِّن برِئ يمّةُ ..
الدّيِّن بُقول الزول .. إنّ خلّى حقوُ يموتُ .. بيخاوي في شيْطانِ ..
الدّيِّن بُقول الزول .. إنّ شاف غلطُ مُنكِرِ ..
ما ينكتِمُ يُسكِتُ .. ببقى الغلط سِتّيْنِ ..
الدّيِّن بُقول تُمرِقُ .. ما قالُ نشيل ساطور ..
قالُ إنّ بقيَت مجبورُ .. ما تبقّى زوّل مكسور
حقّا تكوُّن حارِسو .. ما بجيك بِالمستور
قالُ تكتُّلِ الدّبورِ .. إنّ شوكتو كبّرت طوْر
تقلُّعِ حُقوقِك تبّ …. تمُلّا الشّوارِع نوَر
تُمرِقُ نقيف في الضِّدِّ .. وتواجُه الحُكّامِ ..
إنّ عشّت بعدها يوْمُ .. تقدل تعيُّش منصور
وإنّ الله شالِ روحِك .. ما أصِلُّها الزايلة .. قبرك وراهو قُبور
……..
دليني يا خُرطوم تمّن إبتسامتك إيهِ
خية الحزن حراق .. حرِّقِنّي بي نار ..
اِبقيْ الغيوم في الحُرِّ .. والكسرة والموية ..
موية الدهب لوْنك .. غناي ومجنونك ..
دليني شان اروى .. مِن يمِّ على عُيونِك ..
دليني كان تِهتُ .. في الحُرِّ .. وضليني ..
في اللّيْلِ تضويني .. في البُردِ غطيني ..
يا قرمصيص وعدّك .. كيْف ابقى مِن بعدكِ ..
سويني في عُرسِك .. بي اي شئ راضي .. ان حتّى خدّامك ..
خلفكِ وساندك تبّ .. في العترة قدّامك ..
ايامي كمّلت حبُّ …. تبقالي ايامك ..
…………..
يا يمّةُ ما بنسكت .. نُقعِدُ ونتربّع
كوز السجم بيغرف .. في خيْرِنا ويَتمتّع
نحنُ السقينا النّيْل .. مِن دمِنا الفاير ..
ما بننكتم نُسكِتُ .. في وشِ عميل جاير ..
الشّعب قام ثاير .. ضِدّ الشّقيِّ الغاير
صار بِالرّصاصِ الحيِّ .. يُضرِبُ ويُظِلُّ حائِر
كيْف الرّصاصُ والدّمُ .. ما بيردع الثّوّار ؟؟
الدّم بيغطي الهِمّ .. الهِمّ بيغطي الخوْف
الخوّف عديم الساس .. وأنا جِدّي تهراقا …. حُبوبتي كنداكة .. وعبد الفضيلِ الماظ
فِراس بشيلو الراس .. عبد اللّطيفِ الحُرِّ .. ثائِر شديدِ الباس
ديل سيَرتُهُم يمّةُ .. موية دهب وألماس
يا يمّةُ خليني .. عيشتنا صبّحت هُم .. وأنا مُشتهي الأعراس
يمّةُ الشّبابِ بحيو .. وأنا بِالسُّكوتِ ميْت ..
ووَشيا صار مُظلِمُ .. وشِ الشّهيد ناير
مازن .. مُحمّد خيْرِ .. مصعب .. وتاني حنين
ووَفاء وسارّةً .. مُنير هزاع وسنهوري ..
أيمن ولي الدّيِّن .. حازِم بشيرِ و أحمد ..
ديل كُلّهُم حيّيْنِ
أكرم صهيب أحمد .. ومُحمّد الخاتِمِ ..
عاصِم مُنًى وحازِم .. لابسين حرير أخضر ..
سُندُس وإستبرق .. وأنا جِلديّ بِتفرُّقِ
ساكِتِ وبِتفرُّجِ .. وأمّ دُرُّ عروسِ النّيلِ .. لابسة الرحط والحقّ .. مليّانِ لبان وبخور ..
ويُزغرِدن نِسوان .. لِلكلِّ يوْمُ عِرسانِ وانا يمّةُ دمي بِفوْرِ ..
ما بنكتم وأسكت .. إلّا العسس دِهُ يغورُ ..
إنّ كان سِجنُ يمّةُ .. سجّنا يكوسو رِجال ..
سجّنا ملّانِ ثوّارِ .. ما قالوا فيو سرّاق ..
ما أندسُّ فيو خائِن .. مافيهو ولدا عاقّ ..
فيُهوَ الشُّرّفُ ذمّةً .. فيُهوَ الغباش دفاق ..
الضاق لهيب الشّمسِ .. راح يقهرُ الرّقراقُ ..
وإنّ كُنتي خايفة الموْت .. يمّةُ الرُّجّالِ أحرّارِ
شنّ فايدة العيشة .. والرّوْح موَلّعةً نار
الطُّلّقةِ يمّةُ جوازِ .. لي حقّنا المقلوع
الطُّلّقةِ يمّةُ خلاصِ .. لي زوّل خلاص موجوع
الطُّلّقةِ يمّةُ طُلوعِ .. مِن ذِلِّ مهانةِ وجوع
في ظلّ مصير مجهولِ .. الطُّلّقةِ يمّةُ غسولِ
الطُّلّقةِ يمّةُ ثُمنِ .. لي كلِمة سمحةٍ وقول
الطُّلّقةِ يمّةُ حياةِ .. لي زوّل جريحُ مقتولِ
زيِّ وخزةٍ الشّوْكة .. أقصر كمانِ في الطّوْلِ
قالُ المُناضِلِ يوْمُ .. الطُّلّقةِ ما بِتحرُّقِ بيحرق سُكات الزول

القصيدة الموجهة الى اللص عزام

يا والدة اعفي لي .. كل الكلام ما جاك
رسلت ليك كلمات .. يوم في الحكم سفاك
و سألت صفحك من .. وعدي القطعتو معاك
(إنو الكلام ممنوع.. في شلة الياباك)

كت فاكر إنو غناي .. يوصل بدون مرسال
ويجيني منك رد.. وأسكر حلال وبلال
هل تدري يا يمة.. إنو الكلام إتشال
وإتشرَّ في الدنيا .. من دون يقولوا القال
يمكن قليل الكان.. بيشيل بدون شيل حال
بتي البنيتها حروف .. شالوها ناس أنذال
ناس قالوا لي شاعرة.. ناس قالوا للقدال
واحد كمان يمة .. في قمة الإضلال
ما بعرف أشعارنا.. بكتب كما الأطفال
بي كل قوة عين.. نسخ الكلام وإحتال
قال الكلام هيلو .. قال هو الكتب والقال
ما ركَّز المسكين .. ناسخ بلا إستكمال
في النَّص هناك عندو .. نُصَّ الكلام ما إتشال
ما دايماً السرّاق .. بسرق على إستعجال
والوجعة يماي زول .. معدود

ياريتو لو كان كوز .. كان البطن بردان
النص أساساً كان .. ثائر على الكيزان
ثائر عشان الناس .. تسترجع السودان
بيقولها بالواضح .. ما بنمشي زي الضان
نَصْ بالكلام الفيه .. صار البخور بمبان
ما نَصْ بيكتبه زول .. سارق عميل أو خان
في غفلة منك .. يروح تلقاه شالو جبان

يا سيدي السارق.. يا عالي كالأقزام
هذي البلاد بتئن .. من وعكة الكيزان
ما بس هناك في القصر .. ما بس هم الحكام
في كل مكان موجود .. ما بدلة أو نيشان
الكوز سلوك خاطئ .. زي فعلك الهدّام
كونك تشيل حق زول .. تأذيه بي إمعان
تكبر أناك جواك .. تستصغر الإجرام
علنا كأنك نوح .. في السر كما الشيطان
بي فعلك السئ .. صابرين تلاتين عام
بنحاحي في الأورام .. وندواي في سرطان
ماشين كما الناكوس .. والناس مشت قدام
تسقط لانك كوز .. وإن كنت في الميدان

الليلة تسقط بس .. بس شان سواتك دي
لامن تموت أنا في .. ما برخي ليك حقي
تسقط لأنك لص .. سارق ومتعدي
تسقط عشان مسكين .. حقو بيضيع بعدي

تسقط عشان ست شاي .. رفعوها في دفار
تسقط عشان تربال .. قاسى الهجير والنار
تسقط عشان أطفال .. بينوموا في الحجار
تسقط عشان خريج .. خلى القراية وثار
تسقط عشان لا الدين .. لا القول يكون إتجار
تسقط لأنك فوق .. بالفوضى وإستهتار
تسقط ويوم تسقط .. ما بتنفعك أعذار

تسقط لأنو طريق .. حا نتمو حا نتمو
زيك محال يقدر .. يسقينا من سمو
الزي ود الشمس .. مجراها في دمو
شوفلك بلاد إنت .. و رقراقك إتلمو
بتموت إذا جيت بين .. ود سيف وبين وأمو

يا والدة اعفي لي .. طال الكلام في اللوم
بس كنت مغبون جد .. من ها الجنا المشئوم
سراق حديثي معاك .. عزام وأبوه التوم
بالعود على وعدي .. وعقابي ليو متموم
بالنسبة لي موضوع .. حكامنا والجاثوم
دا أبشرك يمة.. إنو الخلاص قرب .. لي كل زول مظلوم
الشعب قام كلو .. قرر خصوص وعموم
قاب هب زي فد زول .. مليان غضب محموم
قطع الفروع والراس .. من شجرة الزقوم
حاكمنا صار في الرج .. يصحى وينوم مهزوم
باقي الجذور يمة .. بس أمرهم محسوم
بالوعي في الحلّال .. والصبة في الخرطوم
بنشيل جذورهم تب .. والكوز يصير معدوم
والحق بجيبو السك .. ما بالرقاد والنوم


__________________

✌تسقط تالت

tikaina is offline               Reply With Quote               
Sponsored Links
Reply

Bookmarks

Thread Tools
Display Modes

Posting Rules
You may not post new threads
You may not post replies
You may not post attachments
You may not edit your posts

BB code is On
Smilies are On
[IMG] code is On
HTML code is Off

Forum Jump

بحث مخصص

All times are GMT. The time now is 18:29.


Sudan.Net © 2014