Go Back   Sudan.Net Discussion Board - SDB - منتدى سودان.نت > General Discussion Board > General Discussion - المنتدى العام

    

Reply
 
Thread Tools Display Modes
Old 14-Dec-19, 23:56   #1
ash-sharid
Major Contributor
 

Join Date: Mar 2007
Location: East-West
Posts: 682
Thumbs up كلام ليل: إلى أين يتجه التعليم العالي في دماغ الأرستقراطية الظلامية البوريطانية؟

(1)


تقديم سريع



كنا في مؤتمر علمي في أوربا قبل فترة, وإحدى الزميلات من جامعة كوفنتري البريطانية عملت بريزنتيشن يسحر الألباب (البوريطانيين طبعا ناس بتاعين مظاهر, من برة هلّا هلّا) واقترحت بنظام عالمي\عولمي للتعليم


Global Educational System


أخوكم طبعا عن خبرة لمن يسمع أي حاجة فيها عولمي دي, طوالي درجة حرارة اللياقة بتاعة القميص بتاعتو بترتفع.


عندي إصطلاحات لمن تمر عليّ أو يتم ذكرها طوالي بتخلي أجراس الإنذار تضرب, زي حوار الأديان, المجتمع الدولي, التنمية المستدامة, معالجة النزاعات, الحقيقة والمصالحة\التشافي, تقارير أمنستي إنترناشونال الماسورة, إلخ




قلت لي روحي, وبدون جندرة, الولية دي حترفع الضغط بتاعي
زملائي في المؤتمر من الأوربيين وغيرهم قلت ليهم على شكل نكتة, الإمبراطورية ماشة في السكة تمد, لحد ما يجي يوم, شجرة الفاصوليا تجيب قرع والناس ما جايبة خبر, خخخخخخخخخخ




الخلاصة, الواحد بقى يتشاءم بأي حاجة حداثية آتية من البلاط بما فيها إشتراكيو البلاط.










__________________
ash-sharid

-------------
في إنتظار السلام, على المرء أن يلعن التثاؤب وينحيه جانبا
ash-sharid is offline               Reply With Quote               
Sponsored Links
Old 15-Dec-19, 00:23   #2
ash-sharid
Major Contributor
 

Join Date: Mar 2007
Location: East-West
Posts: 682
Smile

(2)


تجفيف التعليم في بلاد البلاط
قبل أن يذيع ويعم قرى وحضر الكون


قبل سنوات كنت ساكن في ألمانيا. وكانت تجربة فريدة من عدة نواحي .. إشتغلت في وظائف بين المتواضع والمتوسط, بما فيها التمثيل. نعم, كنت ممثلا على خشبة المسرح, وشفت حاجات تشيّب الراس.


وتعلمت حاجات كنت درستها كويّس في الكتب, لكن لمن لقيتها قدامي, إتذكـّرت بيت من رائعة أبواللمين (كاتبها إسحق الحلنقي في الحقيقة), ومصيرك بكرة تتعلم.


بعض فصول التجربة المسرحية تجدونها هنا في قصة كضبونيا, ستظل في ذاكرتي إلى الأبد.



على أية حال, نرجع إلى البوست. في ألمانيا دي إلتقيت بعدة سودانيين بالطبع. ومنهم ع. أهه عين ده زول فقري شديد في مجال كدة. وكنا مرة مشينا الجامعة بتاعتهم في مدينة لايبتسِش

Leiptzig


وهي مدينة لي فيها ذكريات وأحاديث. أهه مرة مع عين كنا في كافتيريا الجامعة. وجرى بيننا نقاش طويل مستفيض. وكان مما تحدثت بشأنه التغير في بنية التعليم الجامعي الأوربي بما فيها الألماني. وتغيير النظام الأساسي اللي هو الماستر (الماجستير) حيث تدرس خمس سنوات إجبارية تحصل بعدها على الماجستير, إلى نظام إنفصامي (التريقة من عندي) ممكن لو عاوز تنزل في محطة البكالوريوس بعد ستة أو سبعة سمسترات (أو تقريبا ثلاث سنوات جامعية) وتتوكل تمشي تشوف ليك شغل, سفر, إلخ.


طبعا نظام البكالوريوس ده نظام بريطاني ومطبق كمان في بقية الدول الأنقلوساسكونية, مستعمرات البلاط عينك عينك كندا, أستراليا ونيوزيلند, كما المستعمرة الكبرى بصورة غير مباشرة أي الولايات المضطهدة.


قلت لـ عين, غايتو إتباع الألمان لهذا النظام الجديد, في رأيي بداية النهاية لأحد الركائز الأساسية لألمانيا وهو بنية التعليم الجامعي.


وعشان ما أطوّل عليكم الخلاصة منّي كانت, حيجي يوم تاني العِلم إلا بوست دوك
post-doc


أو بعد الدكتوراة. يعني تاني عِلِم صاح في فترة الدراسة الجامعية الأولي نهي. واستشهدت بحاجة حصلت في بوريطانيا أثناء فترة دراستي الجامعية للبكالوريوس في انجلترا. أولا كنا آخر دفعة هندسة في تلك الجامعة (إن لم يكن في انجلترا كلها) تدرس مادة البرمجة بلغة فورتران.


بعد داك الدراسة بقت بس ماتلاب, وما تلاب ذاتو هسع بقى مخفف (ده هسع ألفين وتسعطاشر دي) عامل زي لبن البودرة






في شواهد تانية, مثلا, الجامعات البوريطانية بدأت تـُقفل أقساما مثل قسم الكيمياء في أنحاء مختلفة من القسم.


جامعتي نفسها الدرست فيها, لقيت إنو التجفيف بتاع التعليم قطع فيها أشواط. رجعت لموقع الجامعة وعملت مقارنة بين المقرر الدرستو في تاريخو في كلية الهندسة, والمقرر اليوم سنة ألفين وتسعطاشر, وقعد أضحك بس.





__________________
ash-sharid

-------------
في إنتظار السلام, على المرء أن يلعن التثاؤب وينحيه جانبا
ash-sharid is offline               Reply With Quote               
Old 26-Feb-20, 21:49   #3
ash-sharid
Major Contributor
 

Join Date: Mar 2007
Location: East-West
Posts: 682
Thumbs up

(3)


تجفيف التعليم في بلاد البلاط
فلم إنجليزي .. وخلي الما يشتري يتفرّج بس


آخر تجربة تدريس لي .. في إحدى الجامعات البريطانية بكلية الهندسة, قبل ما أعك معاهم.


السبب الرئيسي للعكة كالآتي


كورس في إحدى المواد الهندسية قالوا لي أمسك اللاب إشراف بس والفنيين حيعملوا اللاب مع الطلاب وانت كأكاديمي كشـّف معاهم.


وبعد ساعتين اللاب أدي الطلاب تيوتوريال ساعة. لحد هنا كويسين.


أهه بعد أربعة أسابيع من الكورس سألت الطلاب إنتو المحاضر بتاعكم منو القاعد يديكم محاضرات مادة التيوتوريال بالتوازي مع التيوتوريال بتاعي معاكم بعد اللاب مباشرة؟


الطلاب قالوا نهي .. ما في محاضر






يا جماعة, الكلام ده كيف؟


من ناحية تانية وقت اللاب قنعت من إنو أستفيد من اللاب حاصل فيهو شنو, لأنو معمول بطريقة كلفتة شديد .. كل التجارب الهندسية بتتعمل في نفس الوقت والطلاب السبعطاشر مقسمين على قروبات وبيعملوا
rotation


كل أسبوع يعملوا تجربة جديدة. من وجهة نظر هندسية إجراء سبعة تجارب علمية آنيا في مكان صغير لفترة ساعتين وبإشراف شخصين فقط (فنيين اللاب) أشبه بالعبث .. أولا لوجستيا دي دعوة للفوضى .. وعشان ما نطول الكلام, الفائدة بتاعة هذا النوع من المغامرات العلمية في تقديري ممكن خمسطاشر في المية بالكتير.


وفعلا .. الفنيين الإتنين بتاعين اللاب قاموا اشتكوا لي في اللاب قبل الأخير (السادس) إنو الطلاب ما ماخدين اللابات على محمل الجد (مقضنيها ونسة وقرقرة) .. فبعد التيوتوريال طوالي قلت للطلاب ما حصل وكيت وكيت وهذا غير مقبول, لأني ما مسؤول عن اللاب نمرة واحد ومشغول في فترة اللاب عشان أعمل ليكم مادة كويسة للتيوتوريال الكلو ساعة.



نمرة إتنين, غير التقارير بتاعة اللاب المفروض تعملوها بعد كل تجربة في كل أسبوع (حسب القروب), الإمتحان بتاع المادة بعد إطلاعي عليهو في السنين الفاتت داخل فيهو اللاب, فأحسن ليكم يا أصليين تستعدلوا.


المهم, شكـّيت إيميل لرئيس القسم بما جرى (وسي سي لعدد من الزملاء المعنيين), وقلت ليهو بالمناسبة يا عزيزي الفاضل المحاضر بتاع المادة دي وينو؟


قام زميلي المنسق للمادة دي, الوداني اللاب وعرّفني بالفنيين والطلاب نط قال, إنت يا مازن ممكن تديهم من المحاضرة في التيوتوريال, والتيوتوريال في المحاضرة وعشا بلبن. إنجليز ونحبّوا الجرجرة, جررن جررن جررن جررراااا




قلت لي لحظة يا معلم, ما تشك لينا الورق, أنا مجرد مساعد لهذه المادة, مش محاضرها. ما عندي معاهم غير اللاب والتيوتوريال. لكن إذا طُلب أكون محاضر المادة يجب ده يتم بشكل رسمي وإضافة ساعات محاضرة منفصلة بجانب التيوتوريال.




قام عمك قال (والسي سي في الإيميل مدوّر), إنت قايل شنو, التيوتوريال ده ما ياهو المحاضرة ذاتها يا مان, ده الزيت ذاتو يا أصلي





المهم, بكل هدوء, قمت راجعت الـ


بتاع المادة


module handbook


وقلت في الإيميل الأخير, سجلوا عندكم يا مانات


دليل تدريس المادة نص على الآتي


واحد, أربعطاشر ساعة لاب, في سبعة أسابيع بمعدل ساعتين في الأسبوع .. زي ما شرحنا سابقا و احنا في الأسبوع السادس وقبل الأخير من اللاب


تسعة وعشرين ساعة تيوتوريال على مدار السنة؛ إضافة يا عزيزي الفاضل لـ


أربعة وأربعين ساعة محاضرات




بعد الإيميل ده, رسلوا للوكالة العملت لي عقد التدريس معاهم قالوا ليهم الزول ده قولوا ليهو ما يجي تاني



يا معشر السوادنة, لو فيكم محاضرين, أو أي زول درس كلية علمية تطبيقية, حصل مرة عليكم
case


زي ده, إنو مادة عندها تيوتوريال بدون محاضرات؟
أهه دي عملوها السادة الإنجليز. والإستنتاج كالآتي


الموضوع ده فيهو شبهة فساد ضخخخخخخخمة .. الإدارة تقبض قروش محاضرات وساعات تدريس على الورق بس .. تدي المحاضرين زي ناس مازن نص أو تلت قروش ساعات الكورس الكاملة (حسب كتيب تدريس المادة الرسمي), وتورّد الفرق في جيوب الذين لغفوا المال العام.




والكلام ده شهر حداشر الفات القريب ده




عشان السيدات والسادة الأضناب والبط الأمدرماني, الخرطومي والبحري ما يجي واحد تاني يقول لي بريطانيين وإدارة وناس نزيهين وجيناتهم دايرين نتمسح بيها ونعمل فحص جينات نتقرب بها إليهم زلفى














__________________
ash-sharid

-------------
في إنتظار السلام, على المرء أن يلعن التثاؤب وينحيه جانبا
ash-sharid is offline               Reply With Quote               
Old 21-Aug-20, 09:38   #4
ash-sharid
Major Contributor
 

Join Date: Mar 2007
Location: East-West
Posts: 682
Smile

حواديت التعليم العالي* في بلاد الإنجليز

1






آخر عقد تدريس قبل قفلة الكورونا


شركة عالمية (شركتين في الحقيقة), كنت المدرب الهندسي لموظفيهم. الشهادة كانت تدريب هندسي في المستوى قبل الجامعي مباشرة. بنسميه

Higher National Diploma




مركز التدريب اللي عملت معاه العقد شغالين بنظام الإنقاذ, إدارة أزمات. من أول يوم أدونا غرفة محاضرات جيدة نعم, لكن الثغرات أكثر من ثقوب الغربال.


الغرفة من أول يوم الناس فيها داخل مارق, داخل مارق, موظفين, عمال, مديرين, بما فيها المديرة بتاعتي. وأنا أعاين ساااااااي. سوق سمك بس.


في اليوم التالت قلت للطلاب, كتمت


This is a bullsh** situation


بكرة الصباح, يا يكون عندنا غرفة تدريس محترمة بدون الدخول العشوائي ده, يا كمان ده طرفي












------------------------
التعليم العالي أو
Higher Education


رسميا هو طبعا التعليم الجامعي وما فوق, وده المستوى السادس.


في تعليم فني قبل ذلك مباشرة, وده مستوى أربعة وخمسة الذي بعد إكماله تـُعطى دبلومات تسمى
HND, Higher National Diploma




__________________
ash-sharid

-------------
في إنتظار السلام, على المرء أن يلعن التثاؤب وينحيه جانبا
ash-sharid is offline               Reply With Quote               
Reply

Bookmarks

Thread Tools
Display Modes

Posting Rules
You may not post new threads
You may not post replies
You may not post attachments
You may not edit your posts

BB code is On
Smilies are On
[IMG] code is On
HTML code is Off

Forum Jump

بحث مخصص

All times are GMT. The time now is 12:14.


Sudan.Net © 2014