Go Back   Sudan.Net Discussion Board - SDB - منتدى سودان.نت > General Discussion Board > General Discussion - المنتدى العام

    

Reply
 
Thread Tools Display Modes
Old 15-Jun-18, 04:09   #1
tikaina
Golden Member
 
tikaina's Avatar
 

Join Date: Jul 2004
Posts: 8,075
Talking زوجة المرحوم قبل و بعد الواتساب


صلاح سالم

ياسلام يااخ لما تكون بت صغيرة وحليونة ما شافت للدنيا حاجة ويموت زوجها ..
تلقاها فجأة لبست الدمورية ( الكلام دا على ايامنا طبعاً ) وبطلت الحنة والدخان والحاجات الحلوة ديك .. حتى لونها اتغير واخدت لون ترابى غريب وحزين ...

زمان المرأة دى كانت محل تقدير وعطف شديد وكان اخو المرحوم هو المرشح الاول والوحيد للملمة لحم اخوه ..

حالياً مع إنفتاح العالم وتغير المعايير الإجتماعية والأخلاقية أصبحت زوجة المرحوم الصغيرونة محتاجة زول يقنعها انها تقعد فى البيت اربعة شهور وعشرة يوم ..

واحدة حنكوشة راجلا مات يوم الاربعاء .. حدت عليهو خميس جمعة سبت ومشت الكوافير يوم الاحد قالت الضيوف بيجوا يلقوها معشكبة ومافى داعى تبقى ميته وعشكبة - انا شخصياً اقتنعت -

وأحدة تقدمية قالت : مابتتحبس اربعة شهور لانو لو كانت هى الماتت ما كان اتحبس ليها ... ( كلامك صاح يابتى ) الله يكملك ب *سيداو* .

زوجة المرحوم حالياً اصبحت محبوسة وحابسة معاها كل الميديا ووسائط الاتصال .. تتسوق إلكترونياً وتتونس مع صاحباتها بالواتساب وترسل فى صورها بالانستغرام وشغالة فيس وواتساب تقيل ..

بصراحة انا ما عايز اناقش الموضوع دا من باب النقد او الشفقة على زوجة المرحوم ..
كتبت البوست دا عشان اقدم نصيحتى للجماعة القافلين على زوجة المرحوم ( فى الحلااال )
وما عارفين يدخلوا كيف ومتين ..

*نصيحة ليك يالمفتح اضنيك*
تراقب حالتها فى الواتساب أربعة وعشرين ساعة ..

فى البداية الموضوع بيكون مسخن وبتلقاها بره الواتساب اربعة خمسة يوم ...
بعد الاسبوع الاول بتلقى الحالات صعبة وغير مشجعة ...

مثلاً تلقاها كاتبه : ياصلاح انا تانى ما برتاح ..

أو : وووووب على ياحبيب قساي
ياصلاح خليتنى براي )

بعد المرحلة دى بتلقاها بدت تتصبر شوية ودخلت مرحلة الحالات القرأنية خاتة صورة سوداء مكتوب فيها اية ( إنا لله وإنا إليه راجعون ) مثلاً ..
المهم إنت لازم تخليك مركز مع الحالات فى المرحلة ما بعد الاسبوع الرابع .
بالذات لما تلقى زي الحالات دى :

( خليتنى ومشيت انا بعدك جيعانه ما اتعشيت )

او ( ماشفت بعدك الجانى .. انا بى وراك بعانى) ..

هنا انتقلت المسكينة من مرحلة البكاء على المرحوم الى مرحلة البكاء على نفسها ولازم يذداد تركيزك فى هذه المرحلة ..
فى الشهر التانى بتدخل الامور منعرج خطير عايز منك تحليل دقيق للحالات .. مثلا حالة زي

( الله يرحمك ويغفر ليك ياصلاح )

دى حالة مفصلية وحاسمة .. اول حاجة لاحظ انها ذكرت اسم المرحوم من دون اى بهارات يعنى صلاح سادة مافى حبيبى ولا ابو اولادى ولا غيرو .. ودى حالة انسلاخ لايعلم مداها الا الله .. فى المرحلة دى ايضا حا تلاحظ انها بتكتب حالات غريبة زي ..

( عملنا العلينا بس الله ما خلاهو لينا&#128527 ودى بتوريك حالة الصراع الداخلى بين زوجة المرحوم واهل المرحوم .. تعرف طوالى انو اهل الميت لكزوها ب كلمتين فى الجنبه فى الفراش .. نظام والله المرحوم ما لقى العناية الكافية ايام المرض ..
وفى حالات توضح ليك انو الصراع اصبح علنى ومفتوح ...
زي : ( *ماجلطناهو بس الله حباهو* ..)

ودى طبعا كلها حالات دفاعية .. بمعنى ان زوجة المرحوم لسة فى مرحلة الدفاع عن مرماها الى ان تلقى الحالة :

( *رقدناهو فى البراحة لا دفعتوا فى الباطنية ولا الجراحة* .. )

دى مرحلة الهجمة المرتدة نظام انتو كنتو وين لمن نحن بندفع فى كل اقسام المستشفى 😏
جايين تتفاصحوا بعد ما مات!!!

المهم بالنسبة ليك اخى *القافل* انت خليك مركز فى الفترة دى شديد لحدى ما تقرأ : *اللهم اجرنى فى مصيبتى وعوضنى خيرا منها* ) ..
هنا بقى دخلنا خط 18 وزوجة المرحوم دخلت المزاد واصبحت جاهزة للاشارة ..
ونصيحتى تدخل عليها برسالة فيها شوية حنان وغزل ..
( *الله يصبرك يانوارة حلتنا* )
( *كفاية حزن يالسمحة* )
اذا جاك الرد سريع وبطريقة فيها ( *هل من مزيد* ) تقوم تدوس بنزين شوية وتديها رسائل من نوع ( *الحماشة القبل الانبراشه* ) ..
زي : *ما بتحتاجى حاجة ونحنا قاعدين ...*
و( *نحنا)* دى مهمة عامل راسك المدوغس دا ... ما تمشى تكتب : ما بتحتاجى حاجة ( *انا)* قاعد ..
عشان ما تبقى مضمون تختك على جنب وتفتش خيارات أحسن .. لذلك تخلى إشاراتك من بعيد وتتكلم بلغة الجمع ..
فى الشهر التالت تبدأ حديث الذكريات القديمة وأيام ما كنت بتلاقيها راجعة من المدرسة وتكتب فى حالتك ..

*انا كان ضمنت رضاك .. بفتو معاك*

الشهر الرابع ممكن تدخل فى النكات وما تنسى تقول ليها انك افتقدت حلاوة ضحكتا ...
وتظل مراقب الحالة ياوحش ..
لحدى ما تشوف الحالة الحاسمة ..

( *فى انتظار عينيك كملت الصبر كلو)*
اها بعد دا أمشى لقط الشيلة وما تنسى تدعى لينا ..

نسيت أقول ليكم :

كل عام وانتو بخير ياحلوين
__________________


To view links or images in signatures your post count must be 10 or greater. You currently have 0 posts.

tikaina is offline               Reply With Quote               
Sponsored Links
Old 15-Jun-18, 04:21   #2
غريب الداار
Major Contributor
 
غريب الداار's Avatar
 

Join Date: Aug 2015
Posts: 714
Default

تكنكن يا رائع ..هسة الوحدة بقت تفتش للعريس وهي لسة ماقفلت شهور العدة...والغريب ماعاوزة الدبل عاوزة شااااب اول مرة يخش قفص الزوجية ..والغريب تلقاها مخلفة تلاتة وللا اربعة وتقول ليك ماعاوزة اولاد.....
__________________
طالت السفره وأتحفّت مناسم تِلبي
هب الريم وعاودك الحنين يا قلبي
غريب الداار is offline               Reply With Quote               
Old 13-Jul-18, 05:23   #3
tikaina
Golden Member
 
tikaina's Avatar
 

Join Date: Jul 2004
Posts: 8,075
Default

Quote:
Originally Posted by غريب الداار View Post
تكنكن يا رائع ..هسة الوحدة بقت تفتش للعريس وهي لسة ماقفلت شهور العدة...والغريب ماعاوزة الدبل عاوزة شااااب اول مرة يخش قفص الزوجية ..والغريب تلقاها مخلفة تلاتة وللا اربعة وتقول ليك ماعاوزة اولاد.....


بالضبط كدا يا غريبو

عليك الله بدون سغالة.. تعال احكى لينا قصة الدبل
و هل الواحد يتوكل ولا يغسل ايدو و خلاس


صباحك عافية

الصراحة انا متلخبت.. بينك و بين ابو غيدا
__________________


To view links or images in signatures your post count must be 10 or greater. You currently have 0 posts.

tikaina is offline               Reply With Quote               
Reply

Bookmarks

Thread Tools
Display Modes

Posting Rules
You may not post new threads
You may not post replies
You may not post attachments
You may not edit your posts

BB code is On
Smilies are On
[IMG] code is On
HTML code is Off

Forum Jump

بحث مخصص

All times are GMT. The time now is 06:44.


Sudan.Net © 2014