Go Back   Sudan.Net Discussion Board - SDB - منتدى سودان.نت > General Discussion Board > General Discussion - المنتدى العام

    

Reply
 
Thread Tools Display Modes
Old 17-Mar-20, 13:51   #1
TheBigBoss
Major Contributor
 
TheBigBoss's Avatar
 

Join Date: Apr 2006
Location: Anywhere
Posts: 2,906
Talking طوارئ نسائية

صباحا تلقت كل نساء قروب " زهرات حلتنا " النسوي الدعوة من مديرة القروب السيدة / تماضر عوض السيد لاجتماع عاجل في منزل السيدة/ بتول بت مصطفى في تمام التاسعة صباح ذلك اليوم لمناقشة امر هام وجلل ... وفي الزمان والمكان المحددين كان كل عضوات القروب مجتمعات بالدار ووسط اصوات سلامهن وضحكاتهن وصواني القهوة والبخور التي تطوف بينهن تكلمت نفيسة عميدة نساء الحلة متساءلة ... هي يا اخواتي من الصباح في شنو خلعتوني .....
فاطمة ... والله انا زاتي قمت مهجومة لما شفت الرسالة لفحت توبي وجيت.. ما عارفة في شنو... أسألن ست البيت اكيد عندها خبر ...
بتول ... ابدا وحياتكن .. انا زيي زيكن .. تماضر قبيل ضربت لي وقالت لي في اجتماع وحنتلاقى للقهوة عندك الساعة 9
آمال ... الليلة سجمنا ما تكون الكرونا جاتنا في الحلة ...
منى ... هي وينها تقاشر دي تجي تورينا في شنو بوظت اعصابنا ...
ناهد ... يا اخوانا بليس سيريسلي في شنو ... العارفة منكم بليس تتكلم تو سيف ذا تايم لانو تجمعنا دا زاتو ريسكي شديد في الظروف دي ...
حليمة .... اجي ...كرتونة شنو وويسكي شنو كمان استغفر الله ... براكن عارفات تماضر دي حقت امور ... تلاقيها واحدة ما دفعت ليها في الختة عملت لينا الاجتماع .....
وهكذا انهمك البعض في التساؤل والاستغراب عن سبب الاجتماع والبعض الاخر انهمكن في احاديث جانبية وانقسمن لمجموعات ، مجموعة حديثها يدور حول آخر "شمارات الحلة" ومجموعة اخرى انهمكن في التحدث والقطيعة في بعضهن همسا ....
نبيلة وهي تهمس لجارتها احلام... غايتو المراة المتفلسفة التشبه الفيروس دي اصلو ما ردتها..
احلام ... منو دي ....
نبيلة ... المراة المفلقصة الاسمها ناهد دي ... شفتيها بتتكلم وتتنايص كيف ...كبيرة وعاملة فيها صغيرة..قالو عشان يعرسوها اهلها دفعوا دم قلبهم وراء الشيوخ والفقراء لحدي ما جاء راجلها اب عين زايغة دا عرسها..
نبيلة ... والفقراء ما لقو ليها غير دا... هي يا يمة ما تشوفي فلقصتها دي... يومداك ناس محاسن قالن مشن زاروها الصباح قالو لي لقيناها عليها جنس حالة .. شيطان بس ...وبيتها مبشتن جنس بشتنة ... ما تشوفي المكياج والفلهمة دي ...
احلام ... يومداك شفنا راجلها في شارع النيل مع شافعة حلوة وصغمبوتة من بنات الجامعات ديل ... ان شاءالله تشلبو ويخلوها في فلسفتها بليز وابليس ... بيس جني وجن فلقصة النسوان الكبار ...
وهنا يقطع احاديثهن دخول السيدة تماضر وبدايتها للاجتماع ... وبعد السلام والتحية والاعتذار عن التأخير بسبب تأخرها في إعداد القهوة لزوجها المتأخر على غير عادته في الذهاب للعمل، بدأت الاجتماع ....
تماضر ... طبعا يا اخوات انا الليلة جمعتكم لامر هام وعاجل ودايراكن تسمعني كويس ...
آمال بقلق... ياختي قولي سامعنك شفقتينا .. ياها الكرونا الملت البلد دي ولا حاجة تانية ...
تماضر ... لا دي ما الكورونا ... دي حاجة اخطر من الكورونا ...
نبيلة ... سجمنا في شنو تاني ...
تماضر ... طبعا سمعتن بانو الكورونا دخلت السودان والحكومة اعلنت الطوارئ الصحية .. وحسي في وزارات ادت موظفينها اجازات مفتوحة 14 يوم يقعدوا في بيوتهم ما يمرقو .... فعشان بكرة ما فجأة كدا يقولو ويقرروا انو كل الرجال يقعدوا في بيوتهم ... من حسه قلت اخير لينا في القروب دا نشوف نحن حنسوي شنو.. ونعمل اجراءاتنا الاحترازية في القصة دي ...
نفيسة ... يا بتي كان على الكورونا ... القرض راقد والطلح راقد ... ولعن الطلح ادخنن ولوكن القرض ... عوجة ما بتجينا ..
تماضر ... يا حاجة نفيسة المشكلة مش في القرض ولا الطلح ولا الكورونا ... المشكلة في الرجال الحيصاقرونا 24 ساعة ديل ... كفاية نجضونا ايام العصيان المدني مع انها كلها 3 ايام بس ...
مدينة .... اي بتذكرها الايام ديك .. ياخ انا قربت اشيل شنطتي امشي ناس امي ... الا امي منعتني قالت لي انا زاتي جاياكم دايرة اطفش .. ابوك لهلهني ... هههه
تماضر ... وعشان تعرفو اهمية الموضوع دا ، الصين حسه بعد الفايروس مشى منهم قالو نسبة الطلاقات زادت فيها زيادة شديدة جدا ودا بسبب انو الناس كانو معزولين في بيوتهم ومصاقرين بعض ومشاكلهم كترت خلال مدة العزل دا وبقوا يتشاكلو في اي حاجة ... فعشان كدا وتجمعنا دا ما يتفرتق ونحن زي ما عارفات عندنا مصالح مشتركة وختات وعدة وملايات وقروبنا دا ما يتفرتق بسبب المشاكل والطلاقات الحتحصل لا قدر الله ... قلنا نعمل الاجتماع التشاوري دا ...
احلام ... والله كلامك صحي ... الشفع من قفلو ليهم المدارس قلبو دماغنا .. اليوم كلو شكل دا ضربني ودا شال حاجتي ... يبقو شفع ورجال علينا ..... ههههه كان كدا اخير لينا الكرونا .... يعزلونا 14 يوم لا جوطة لا قومي سوي لا قومي جيبي ...
امل .... ارتاحي ياختي ... كلام يعزلوك براك دا في بلاد بره ... هنا دا يعزلوك في البرندة مع الكهرباء القاطعة دي والبعض يهردك ويلبسوك كمامة ويجيبو ليك البوتجاز وعدة المطبخ جنبك .. تقحي وتعوسي وتطبخي ... رجالنا ديل ولا ناس تانين ... على قول بسمات حنجيب ليكم رجال يقدروكم من وين حبايبي دا المتوفر في السوق ... هههه
نادية ... طيب يا اخوانا انتو المشكلة وين ... ياخي دي حاجة رومانتك جدا وفرصة تقعدو مع رجالكم تفهموهم وتقربو منهم ... وباي ذا وى لازم تكونو الاتنين متعقمين كويس ...
بتول بغضب ... والله ياختي راجلي دا لا بتفهم ولا بتفاهم ولا دايرة افهمو .. افهم ليهو شنو ... هو زاتو لروحو ما فاهم نفسو ...الرجال ديل كلهم غير النقة والنجيهة ما عندهم شي يتفهم ... قال نفهمهم قال ..
آمال..... هههه وبعدين راجل شنو البتعقم ليك دا .. الواحد يومو كله حايم بره يتضحك ويتكشم ومن يدخل البيت بصر وشيهو وينقنق ويكورك ويبزغ التقول جابرينو يجي البيت ...
تماضر ... هههه ... نادية دي حقو تعذروها .. اصلها مستجدة في العرس ومصاقرة الرجال ... بكرة بقع ليها كلامكم دا ...
نادية مدافعة عن وجهة نظرها... لا سيريسلي انا ما فاهمة المشكلة شنو ... طيب دايرننا نعمل شنو ...
تماضر ... ايوااااا... عشان كدا نحن هنا عشان نتفاكر حنعمل شنو ونستحمل الرجال ديل كيف ... والله 14 يوم ما بسيطة ... الدنيا دي كلها بكل الهردبيسة الفيها اتعملت في اسبوع ... وهم لا حيكون في كورة يتفرجوا فيها ولا نادي يمشوه ولا شلة يقعدو معاها ... فلازم يكون عندنا خطط واجراءات ننفذها عشان المرحلة دي تتم بسلام ونمرق منها نصاح وبكامل قوانا العقلية..
نبيلة ... انا غايتو بقترح ما دام المدارس قافلة كل واحدة تسوق اولادها وتمشي بيت ابوها تقضي الفترة دي هناك معاهم ... وتقول ليهو فرصة الاولاد يقعدو مع جدهم وحبوبتهم شوية...
تماضر ... طيب كويس دا اقتراح واحد .... اها في اقتراحات تاني ...
نادية ... انا عشان ما تكون ايام بورينغ ، اقترح كل واحدة تجيب حاجات البيت وخاصة الحاجات البحبها راجلها وكل يوم تفاجئوا بحاجة بحبها ، وممكن تشاركيهو هواياتو واقري كتبو وناقشيها معاه والعبو معاهم ليدو ..كوتشينة اي شي ، رجعو ذكرياتكم بتاعة الخطوبة وقبلها ، ومن النت نزلي افلام واقعدوا احضروها مع بعض .. وكدا .. واخلقو ليكم جو رومانسي كدا مع بعض
آمال ضاحكة ... هههه انا بقترح اول شي ناهد دي تحجروها مني لانها بتقوم علي المصران.. رومانسي شنو حبيبتي البنستحملو ١٤ يوم.. وبرد على اقتراح نبيلة اني ما بمرق اخلي ليهو البيت وامشي اتضايق واضايق اهلي .. وما دام الكرونا دواها العزل .. فانا بقترح نعزل رجالنا ديل عننا تماما ... وكل واحدة تقول لراجلها يا ود الحلال عشان لا تعديني لا اعديك وانا مراة صاحبة عياء .. اختار ليك اوضة خت فيها التلفزيون وشغل قناة الجزيرة الفالقنا بيها دي واعزل روحك فيها وانا بختار لي اوضة اعزل روحي فيها انا ووليداتي... تعمل اكلك وشاييك وقهوتك براك ونحن كمان بنعمل حقنا برانا .. وكان احتجت تسألني في شي رسل لي واتساب بوريك ليهو لحدي ما تنزل الشغل والمرض يختفي ... ههه ياخواتي دي فرصة لازم نستغلها كويس ...
مريم ... انا مرة قبضتو بتغزل ليهو في واحدة في التلفون فمسكتها ليهو ذلة بذلو بيها كل ما جني يقوم علي ، هههه يومها هجت ليك فيهو جنس هيجة ونكشت ليك تفتي دي ومديت ليك بوزي دا شبرين وبقيت صارة في الدخلة والمرقة .. هههه وهو سكت ساكت ولبد شكلو خاف ولا بيسألني في شنو ولا مافي شنو .. براهو يسوي اكلو وشايهو وقهوتو ... اسبوعين هو مرتاح مني وانا مرتاحة منو لحدي ما هديت..... ههههه كان كدا يومو اليجيني يقول اجزوا لينا بوريهو وش الكروناالبعرفو ...هههه
احلام ... انا بحكم انو راجلي مسافر برة السودان وما بقدر يرجع مع القفيل الفي الدنيا دي فما عندي مشكلة وبقترح بدل اليوم كلو تكونو مصاقرينهم وضغطكم زايد ، فبقترح تجو كل يوم عندي تتونسو وتفضفضو وندي بعض الدعم المعنوي عشان ما تحسو بالضغط النفسي وتموتن ناقصات عمر وبدل تمرضكن الكورونا يمرضوكم الرجال بنقتهم ..
وبعد تداول عدد من الاقتراحات تم الاتفاق والتصويت على اقتراح العضوة احلام بان يجتمعن كل يوم خلال ساعات النهار بمنزل السيدة / احلام للحجر والدعم النفسي والمعنوي ومناقشة اي مشكلة قد تثور لاية عضو وتزويد الدار بكل المعينات اللوجستية على الحجر، كما تم تخصيص رقم هاتف كخط ساخن للتبليغ عن الاستفزازات اليومية والارهاب الذكوري ، على ان يتم متابعة الحالات بصفة يومية وتقييم الوضع ودراسة بقية المقترحات على حسب تطور الوضع وامتداد فترة العزل وقد اجمع الاعضاء على رفض الاقتراح المقدم من السيدة ناهد جملة وتفصيلا مما حدا بها للخروج غاضبة من الاجتماع...
__________________
اختلاف الرأي لا يفسد للود قضية
TheBigBoss is offline               Reply With Quote               
Sponsored Links
Old 17-Mar-20, 17:14   #2
shatat
Major Contributor
 

Join Date: Mar 2002
Posts: 2,923
Talking


TheBigBoos ســـــلام
علي قول ناهد..نايس تو سي يو .....(زهرات حلتنا) قروب ما ساهل...متابعين الوضع والحاصل لاخر خبر طالع...شكرا ليهم شاركونا اجتماعهم..ان شاء الله القاهم تاني هنا...في اجتماعهم الجاي...بطاوي كرهنا النت ذاتو...ههههه..قعاد الرجال في البيت بيني وبينك..اخير منو الكرونا...والعجب الشفع..عشان كدا اختارو بيت ( احلام) الراجل بره والظاهر لسه ما عندها شفع...غايتو ما مرتاح لمرقة (ناهد) زعلانه دي...فيها إن..الله يستر..هههه

شكرا ليك ...متعة السرد...دمت بخير..
shatat is offline               Reply With Quote               
Old 18-Mar-20, 09:12   #3
NADOSH
Moderator
 
NADOSH's Avatar
 

Join Date: Feb 2004
Posts: 40,470
Default

__________________
ندوش ست الحوش المرشوش


To view links or images in signatures your post count must be 10 or greater. You currently have 0 posts.
NADOSH is offline               Reply With Quote               
Old 18-Mar-20, 14:15   #4
tikaina
Golden Member
 
tikaina's Avatar
 

Join Date: Jul 2004
Posts: 8,558
Default




😄😄😄😄😄😄😄😄

زمن و الله

علك بخير


__________________

✌تسقط تالت

tikaina is offline               Reply With Quote               
Old 18-Mar-20, 19:16   #5
TheBigBoss
Major Contributor
 
TheBigBoss's Avatar
 

Join Date: Apr 2006
Location: Anywhere
Posts: 2,906
Default

Quote:
Originally Posted by shatat View Post

TheBigBoos ســـــلام
علي قول ناهد..نايس تو سي يو .....(زهرات حلتنا) قروب ما ساهل...متابعين الوضع والحاصل لاخر خبر طالع...شكرا ليهم شاركونا اجتماعهم..ان شاء الله القاهم تاني هنا...في اجتماعهم الجاي...بطاوي كرهنا النت ذاتو...ههههه..قعاد الرجال في البيت بيني وبينك..اخير منو الكرونا...والعجب الشفع..عشان كدا اختارو بيت ( احلام) الراجل بره والظاهر لسه ما عندها شفع...غايتو ما مرتاح لمرقة (ناهد) زعلانه دي...فيها إن..الله يستر..هههه

شكرا ليك ...متعة السرد...دمت بخير..
الله يسلمك من كل شر، ونايس تو سي يو توو.. كنت مضيع الباسوورد ولقيتو قلت نجي نبطبط معاكم شوية.. انا افتكرت بطاوي هو الوريث الشرعي والوحيد للبورد
__________________
اختلاف الرأي لا يفسد للود قضية
TheBigBoss is offline               Reply With Quote               
Old 18-Mar-20, 19:17   #6
TheBigBoss
Major Contributor
 
TheBigBoss's Avatar
 

Join Date: Apr 2006
Location: Anywhere
Posts: 2,906
Default

Quote:
Originally Posted by NADOSH View Post
هلا ندوش.. انتي لسه هنا مديرة ولا بقيتي رئيس مجلس الإدارة
__________________
اختلاف الرأي لا يفسد للود قضية
TheBigBoss is offline               Reply With Quote               
Old 18-Mar-20, 19:19   #7
TheBigBoss
Major Contributor
 
TheBigBoss's Avatar
 

Join Date: Apr 2006
Location: Anywhere
Posts: 2,906
Default

Quote:
Originally Posted by tikaina View Post



😄😄😄😄😄😄😄😄

زمن و الله

علك بخير


هلا وغلا اخونا الزمان.. ان شاء الله بخير وعافية وكل أحوالك وامورك كما تود... ما شاء الله لسه صامد بهنا
__________________
اختلاف الرأي لا يفسد للود قضية
TheBigBoss is offline               Reply With Quote               
Old 24-Mar-20, 11:21   #8
العويرة
Intermediate Contributor
 

Join Date: Sep 2007
Posts: 119
Default

كتير خير الكرونا
خلتك تظهر
وتلبس اصفر
العويرة is offline               Reply With Quote               
Old 24-Mar-20, 15:46   #9
shatat
Major Contributor
 

Join Date: Mar 2002
Posts: 2,923
Default




TheBigBoss....
اول حاجه بعتذر كتبت اسمك خطأ في المداخله الفوق...لو ما لاحظت ليها اكون انا بالغت.....

بطاوي عامل زي الكرونا...حابسنا ..ومتجدع في البورد...وزي الواتساب اليومين ديل..كمية من الدكاتره ومرشدين وناصحين وقوالين وبتاعين اشاعات وبتاعين نظريات...كمية من الغباء ما عادي...المنقه علاج للكرونا..غايتو............

نرجع لموضوعنا....اها..ناهد عملت شنو..

تحياتي ليك والجميع باعلاه
.........................
ماتطول الغيبه...
shatat is offline               Reply With Quote               
Old 29-Mar-20, 19:49   #10
المخضرم
Crown Member
 
المخضرم's Avatar
 

Join Date: Feb 2005
Posts: 11,350
Default



عرضحال وكشف حال عديييل
المخضرم is offline               Reply With Quote               
Reply

Bookmarks

Thread Tools
Display Modes

Posting Rules
You may not post new threads
You may not post replies
You may not post attachments
You may not edit your posts

BB code is On
Smilies are On
[IMG] code is On
HTML code is Off

Forum Jump

بحث مخصص

All times are GMT. The time now is 04:59.


Sudan.Net © 2014