Go Back   Sudan.Net Discussion Board - SDB - منتدى سودان.نت > General Discussion Board > General Discussion - المنتدى العام

    

Reply
 
Thread Tools Display Modes
Old 25-Jan-19, 10:26   #1
tikaina
Golden Member
 
tikaina's Avatar
 

Join Date: Jul 2004
Posts: 8,331
Default الرجعة للبيت القديم




♡الرجعه للبيت القديم♡
●محمد الحسن سالم حميد●
أنا ماشي راجع لى بيوت
تفتح لي ادق أومـاأدق
من غير تقول الزول منو
ولا حتى عل الداعي خير
لا مالك الجابك شنو
..........................
لبيوت بجيهن
في أي يوم
إن جيتا ليل أو جيت دغش
طوالي ادفر الباب واخش
مـرات اضيق قاصر الطريق من بيت لبيت
وفي بيتنا كُرُبش
زي نسيمه
معدي شيمه
لا أوش لاكُش
.....................................
خابراني كلوب الفريق
زولاٌ رفيق الليل
ووناس الدغش
.....................................
لاقطعت نوم النايمين
لا الباريي للحيشان تقش
عند شوفتي تجري على هـدم
في محلها الشوق يترسم
تنجهني..
حتــان بالإسم
تندهني
عقبان تبتسم
بسمة بنيات ناس غبش
......................................
هادي المخاليق مؤمنا
بسماحة الناس الهنا
كم تأمنك يوم تأمنا
ولا فرق
بين الضيف وانا
غير كم كليمه ملونه
بالإلفه.. هليج... إعتنا
هــادي البيوت مطمنا
ودايماً قريبه من البعيد
زي مو غريبه على الدنا
مـاها المريبه ومـاب تكيد
مفتوحه طيبه محـاننه
زولاً يجيها في كل فجر
ولـلا ان يتم
كمين سنه
تتلقى زي أم الجنا
وترشع سحـابات المنى
بالصحه... بالعز... بالهنــا
ينجيك مـن اولاد الحرام
يحفظ ... يغتيــك ربنا
............................
هــادي البيوت مابتتلخـم
في الحكـوه
مـابتنضم كُتُر
لاهـا البتتصنع نضــم
شايله الفصاحه من الطيور
اليوت تغني على التمر
ونور المهـابه
من النجـم
مطعــوم سكاتها
من الصبر
بينــا وحروف الأمنيات الطيبه
ألف صلة رحــم
على رغم آفــات الزمن
الصُرمه... حــافات الفقر
وحش المقادير
النهــم
سيل المباهــاه المدلهم
نبرو المواعيظ الجهم
من نــاس كُتُـر
عن قصــة النار و القبر
في وضع أضيق من جُحُر
والنــاس لُو خــارجين لو كُفٌر؟!
..................................
هـــادي السمر
ست الضراعــات الخُدُر
عـارفاهـو من وين
جــا الفقـــر
والحــال سِجِـم
ياحكمتا الزي كلمتا
المـن خدمـتا
واطــاته واحـده
وفد هِــدِم
أية غفيـــر فوق الحفيــر
حقاني قلبــو على الخديــر
حيكومتــــــا
......................................
مـــاها البتتكلف سُتر
مستوره خلقه ودا المهـــــم
مفتوحه لي كل البشـــر
من طينهـــا بس
كل البسيماتن تبق
لو وش زماناتن عبس
مفتوحه قلباً كلو خيــــر
شايل حمـالتو بلا جُرس
مفتوحه كالفضــا للطيور
وبيوضه للصيد و الدبس
لا طبله.. لاكيلون سويتش
ولا ترابيس لاجَرس
لا سلك شائك .. لا تَرس
لا غفيــر تفاوضــو ولا حرس
لاكلاب تشمـــك
شــم جــراب
فتيش وجــس
لا آه .. لا سب
......................................
وناس ستي نور
كتلو الكلب
كتلوهـو مجبورين غصب
مـامن نياحتو ولاسعــر
ظنو الكلب...
بين الفريق حـامي البطينين اللعب
آخـر الليالي من البيوت
قافل الطـريق سـادي الدرب
لاخواتهـا قالت ستي نــور
مــادام في امــان
والناس بخير
سعي الكلاب في الحله شـــر
هـوهيـوا بعزاق للأجــر
أحسن تعيــش بي راحتها
تمشي الجنـاين .. يالبحــر
إن كان تطفش للصبـار
واب عفنه تشغـل للورر
الحله يكفيهـا الولاد
يكفي البهيمـات..الجـداد
يكفي الطيـور
الفي الشدر
الحله يكفيهـا البشر
كان جـاها شر
الحله يكفيهـا الحصانه الفيهـا
مـادارت كجـر
حـرس الزرائب؟
شِن فضـل
فِطـن الزرائب غير بعـر؟!
صنت شويتين ستي نـور
شالت حجـر وجدعـت حجـر
جدعـت حجـر وشالت حجـر
وقـالت:-
قرايبهـا ذات ليل
يمكـن يجـوها من السفر
أو زول غريب
حـاربو الدليـل
عـابر سبيـل زنقـو المطـر
يقصـد رواكيبهم جَـوَر
أول شـي يتلقى الكلب
أللا بيرحـب لا بيبش
وليشن يتـورنا الكلـب
وليش الكلب يبقالـنا وش؟؟؟
وكان الكلب لازم يمـوت
الطفشوهـو حـرن يطِش
وكان الكلب لازم يمـوت
شـان المحبه الفي القلـب
تحيـا
وخيوط زمـن الوصـال
لا تنسلب لا تنقلب
ومـــات الكلب؟!
....................
وين يـابيوت
عـز البرد
ضمتنـا كونية دِفي
ومـن لدغـة الصيف الغـريب
قـامت حـواية همبريب
وتحـت القمـر
حيشـانا قيزان السمـر
تـدينا لامن نكتفي
يابيوت من الخـاطر قُراب
ورِهـاب رِهـابات تختفـي
الإعتـذارات مـابتفي
وجيت مـالقيتكم مـاها في
أبوابنـا مـو صاجات حـديد
يغسـل درابزينا الرزاز
حيطـانا مـو اسمنت وحجـر
شباكنا لاسيـخ لا قـزاز
ياضـو جمـاعاتاً عُزاز
زي مـاك بشـر
مـامنو شـر
لِز الخشـم باب.. مـااندفر
قُص الدُقُل
تلقى الكُشـر
ياشيل حطيبه من الأرض
لاخـوف ولفيت لا حـذر
لي كلبة الباب أبقى هـاز
مفتاحنا مـو اكتر
من كشـر
ماابوابنا من شـدر الحراز
............................
والحيطـه أقصـر من وصا
قالوهـا عِن ساعة السفر
وكان القطـر قام صوتو راز
..............................
البيت دا بيتك يـاحبيب
أدخـل.. مخـير وماك غريب
اتمـدا في اقـرب عنقـريب
مبهـول في حـوضو الهمبريب
النيمه يا العنـابه ضُل
أغشى التُكُل
خـرمان في شـاي
جيعـان أكُل
وداك التمـر
والزير قريب
بايت من البارح ملان
راقـد في صـدر الهمبريب
دُر تقـرا ديك كتب الولاد
قلقت أو طـال الرِجي
كورك. نقول لك... هـوي...
بُعـاد
رسل لنا المُرسـال نجـي
يـا... روق
بإحساس المحـب
سيـد بيت
وعننـا مـاضِهِب
الهيلنا هـيلك شِن نـدس
مـاطال عُمـراً يتحسب
في ياتو بنك
وياتو عِب
يـات خزنه غير
خِزن النفوس المــــاهله
مفتاحهــا القلب
........................
قول لابن آدم
في بلد
طـالت معاناتو وتِعِب
سكانو دايشين بالشرق
وحكامو طـاشين بالغرب
إحنا اللي فاقديـن
أي شي في الدنيا
مـــالكين كل شي
بالفينا بالحيل ودا الدرب
والتابع الصــاح ماضِهِب
شِن الأفنديـه الكبار
خـدم المرابين التجـار
حشـم المبارين الكِجـار
الأرزقيــه.. كِضِب كِضِب
نحنا التعابى
ال باختيــار
صُرمتنا ترتـاح الديـار
ينجـم بال بلـداً تِعِـب
نحنـا الغلابه
اكبر حِزِب
لابنتغلب ولا بنتقلب
والتـابع الصـاح مـاضِهِب
...............................
ياهرشه ... نفخة زيف كضب
نحيـا وتموت؟!
عرشك خيوط العنكبوت
قبال دا هزينـا
ووقع....
الأعتى منو بنا وثبوت
لا بــوت شفع
لاأجــدى تــوت
لا غـرب
لا شرقـاً نفع
لا رمــي حراسه ولبوت
لا احلام شمولية زلوط
فطيس شيوعيه وفزع
من حتى صـوت شفع كعوت؟؟
يــــامن بلع للذمــــه لع
تنجـى الغلابــه من الحكي
وشــرع الله يبرى من الشفــوت
.................................
ياواقفــه
بين كهنـــوت و بوس
خلي القلـوب
العـامرة بوص
يالحاضـره ديمه
كما السمح
مشـدوهـه زي أم العروس
الجـايي لي خلقـك قمــح
والمــا دخـل حلقـك
دا روس
..............................
وانــا ماشي
باكـــر
لي نفوس
ناس زي بعض
طوالي نحنـا مع بعض
مـابنرجى عيـدين الله عــد
لا الطـارقه من عـافي و مـرض
طوالي في
نـدي التميرات العـرق
تـدينا خير
غيـر العـرق
قفـازا عـاد يطلع حـفي
ويجـع زمــان الحش حفي
نكرع شرابنـا ان كان عكـار
وان كان عكار وان كان صفا
-
-
-

تسقط_بس#

__________________


To view links or images in signatures your post count must be 10 or greater. You currently have 0 posts.

tikaina is offline               Reply With Quote               
Sponsored Links
Reply

Bookmarks

Thread Tools
Display Modes

Posting Rules
You may not post new threads
You may not post replies
You may not post attachments
You may not edit your posts

BB code is On
Smilies are On
[IMG] code is On
HTML code is Off

Forum Jump

بحث مخصص

All times are GMT. The time now is 06:48.


Sudan.Net © 2014