View Single Post
Old 13-May-19, 19:50   #1
tikaina
Golden Member
 
tikaina's Avatar
 

Join Date: Jul 2004
Posts: 8,389
Talking من روائع كمبيوترجى



كيف تعرف نفسك بقيت عجوز

غريندايزر ما اقنعنى انى قديم لانو اليتيوب كتر خيروا بيرتق الثغرات بين الاجيال.

عاين الحاجات المفروض تقنعك بى انك قديم و مفروض تجهز باركنك

اول حاجه الحكاية بتبدأ بالشعر, تلاقيه بيقوم فى حتات ما مفروض يقوم فيها عند ابن آدم طبيعى الا ليؤكد ان داروين ما كان بيتكلم ساى, و يبقى يتلون على كيفوا و يسيب حتات ما مفروض يسيبها, يعنى غزارة فى الانتاج سؤ فى الادب و التوزيع.

تانيا, عدم المقدرة على التركيز فى حاجتين, يعنى تكون بتحك , لازم تنكرش كلك بعدين تعاين للمرا الملطوعة قدامك ليها ساعة منتظراك تتناول كباية الشاى البردت فى يدها, و تاخدا منها و تكمل كاروشى.

تالتا, تبقى كرهتك فى الدنيا النعلات المقلبات و الانوار المولعات بلا سبب, تبقى الليل كلوا حايم تطفى فى الانوار و تهرج. المشكلة مافى زول فاهمك بتنوم بتين

رابعا الكنكشه, و دى ليها علاقة بالديركسون تحديدا, تكنكش فيهوا و تلصق جبهتك بالقزاز و تقريبا من لحظتها لحدى ما تموت ما بتجيك مخالفة رادار.

خامسا لمن تنتبه لى انك بتحكى حاجات كان صدقتا فيها كان كضبتا مافى زول بيقدر يغالطك لانو بى بساطه مافى ريفرنس, المراجع كلهم يا ماتو يا عندهم باركنسون ولا الحتات الكتا فيها دى اساسا اتمحت من الخريطة

سادسا بقى الغتاته, تبقى زول غتيت و لسانك متبرى منك, و اى كلمة تقولها بتخلى الناس تقوم جارية من قدامك, لانو كل تعليقاتك محرجه و فى حتات صعبه

سابعا بقى ليه علاقة بالمدام, لمن المدام صوتا يبقى جهورى اتا بيكون صوتك زى البلى و عادى ترد على التلفون يقولوا ليك يا بت هوى نادى اخوك.

ثامنا لمن تبقى واحده من افضل هواياتك لم الورق و الاكياس, اى جحر حاشى ليك فيهو كيس واى فجة حاشرلك فيها جريده , فى الدولاب اكياس , تحت المرتبه اكياس, فى رجل السرير رابط ليك كمشة اكياس و الجرايد لامن تصفر لاميها و فرحان بيها.

تاسعا, الاكل تبقى زى الجكس, شغال بى اطراف اصابعينك لقمتين و تقوم على حيلك و, لمن اكلك المفضل يكون كل ما ليس فيه روح و المفروك و المدعوك و الملغوس, المهم اكلك بيوتر آمال اى شاب او جكسوية فى البيت و مرتك دايما تقول ليك يا راجل هوى الفاصوليه دى ما بتنفع معاك

عاشرا, الحوامه بلا سبب يالله دى بالزات تخصصك. كل يوم من ما تصبح تسل رقبتك و تمرق, تحوم الواطه دى كلها من دون اى سبب مقنع غير انك عايز تشترى حبل غسيل, اولاد الحله قاعدين فى الكورنر تجى تقيف ليهم سقد, البت عايزة تتاوق لى حبيبها من باب الشارع تلقاك فى خلقتا و من ما الشمس تبرد تمرق بى خرطوشك ترشرش فى الحيط ولا تقعد ليك فى كرسى تهنضب الماشى و الجاى .

و اهم حاجه قبل الحاجات دى كلها, الهرجى الكتير, اليوم كلوا تكورك, يا ولد يا بت, يا فرتكان يا علان و الله يحل منك الجزار و بتاع الفول, كل يوم تهرج فيهم اللحمة غاليه و الفول غالى و الدنيا دى كلها كدا ما راكبا عدلها

الحاجات دى ما بالضرورى تكون كلها فى لحظة واحده لكن كان جاتك اى واحده فيهم ابقى وصى ام العيال و قوى صلتك بى ناس الحلة

__________________

✌تسقط تالت

tikaina is offline               Reply With Quote               
Sponsored Links