View Single Post
Old 08-Aug-13, 09:20   #30
مستر جنو منو
Major Contributor
 
مستر جنو منو's Avatar
 

Join Date: Apr 2011
Location: جوة الجلابية
Posts: 951
Default

Quote:
Originally Posted by 7abiba sudayna View Post

كان موقف اليوم فى توزيع المشمعات فى الفتح صعب
وبرغم كان الموقف فى الحله الجديده صعب لكن الفتح فاتوا عدددددددددددددددددددديل
اكتشفت ان ناس شرق النيل التعامل معاهم كان مرن اكتر من ناس امدرمان
والزول بيحاول ما يلومهم ويديهم العذر عشان صعوبة موقفهم وظروفهم
لكن بالجد الحصل اليوم كان قاسى وما قادره القى له تفسير ومعنى واعرف سببه
مشينا فى امان الله ماجرين هايس فيها المشمعات وكراتين بالبسكويت والشباب المتطوع
لمن وصلنا بداية الحله لقينا فى بيوت مهدمه وقفنا ونزلنا ليهم ووزعنا
وكانت البدايه هادئه جدا ومبشره جدا
قولنا نغوص زياده بجوا وقفنا فى حته البيوت المهدمه فيها كتير
انا كنت ماسكه كرتونة بسكويت بوزع لشفع
وسبت الشباب توزع المشمعات
جاتنى حجه كبيره بلا مقدمات دخلت فينى شمال
شى فهمتوا وشى ما فهمتوا
الكررتوا كتير جايين تضحكوا علينا ببسكويت وتصورونا مش عيب عليكم
مع ملاحظة ان مافى زول كان بيصور فى لحظتها اصلا كنا مركزين فى التوزيع كلنا
وبديت تنهر فينى وصوتها يعلى وكان فى كبسه حصلت فى عربيه الهايس وحاوطوها الناس
حاولنا نقول ليهم نحنا حنمر فى البيوت وندى انتظرونا فيها
لكن لا حياه لمن تنادى
النساوين اتجمعوا فينى والست الغضبانه مصر تستمر فى التنهير فينى
وتقول ما شوفنا شى بس نسمع
ونحنا عايزين مشمعات
قولت ليها نحنا جايبين مشمعات ونديكم ان شاء الله
وهى مصره تكورك فينا وتمسح بينا البلاط
انا شخصيا بدى الدم يفور فى راسى واكتم
لكن فاض بزميل جنبى من كواريكها ورد عليها
لمن وصلنا للعربيه الهايس القامت جاريه عشان تخفف الزحمه
مسكت كميه من المشمعات قولت اوزعها على النسوان المحاوطينى
ودايره ادى كل وحده براحه
الحصل شنو ما فهمت لكن لقيت طرحتى فجئه مافى راسى
وحالتى ربطاها بالدبابيس
ولقيت المشمعات ببح
الاستوعبته فى ولد جيه دافر وجر المشمعات ومعاه طرحتى
اظن لكن النسوان برضو مع الجر جروا
غايتو ما لميت فى مشمعات لكن كويس لقيت الطرحه واقعه بهناك
شلتها ولقيت باقى المعركه شغاله كويس فى الهايس
حاولت اقول ليهم بتنظيم
بالترتيب
ولا حياه لمن تنادى
الناس دى بقيت بتضارب عديل
زول الهايس خاف على عربيته
وقام بدا يتحرك
الشباب قالوا لى حاولى اركبى ونحنا بنتصرف
فعلا جريت ولحقتها وتلبت
وقررنا نفن المشمعات والهايس جاريه لناس البنلقاها واقفه قدام بيتها
ولقينا لينا بوكس كبير برضو بيوزع كده وهو متحرك يدى ويجرى
فى حته لقينا اننا مطاردين عديل بحافله ورقشه وناس
ولقينا القسم قدامنا
قولنا نستغيث بيهم
اكيد حينجدونا
وقفنا بره ومع وقفه كانت الناس وصلتنا تانى
بدوا ناس الشرطه يدافروا ويزحوا فيهم وقالوا لينا ادخلوا الحوش
لمن دخلنا جيه زول فيهم شال باكيت مشمعات مقفول ومشى دخله جوا
ما فهمت معنى الحركه اصلا شنو ويشيلوا لشنو
كان اصلا بقى عندنا اعداد بسيطه
جاو كم نفر دخلوا الحوش واديناه ليهم
وبقينا فى اليمرقنا من الحوش
مع الناس السديت البوابه دى
واترجيناهم يمرقونا بالعربيه سليمه ما عايزين منهم اكتر من كده
وبعد مسافه فعلا فتحوا لينا البوابه ومرقونا الزلط وحاشوا الناس بالجنبه
طول السكه وانا بحاول افسر واحلل الحصل
ناس العتيد فى شرق النيل ما عملوا فينا كده وكانوا مسالمين جدا معانا
ناس الحله الجديده فى امدرمان برضو قومنا جاريين منهم لكن اقلها ما حصل خبط زى الشوفناه فى الفتح
قولت لو كان الزول بيقدر يثق فى الشعبيات الفى الحلات كان نسق معاهم
ولا حتى الشرطه كان تتعاون معانا وتوفر لينا الحمايه بدون مقابل
حمدته ربنا طلعنا سليمين ووزعنا الحاجات برغم ما فهمت زاتو اتوزعت كيف
وكلام الست الكبير ما داير يمرق من راسى
اكيد الشريحه المتضرره كبيره ومهما المتطوعين قدموا فى ناس ما بتتغطى وبتزعل ليه ساعدوا ديل وما ساعدونا
وفى ناس للاسف مستغليه الوضع غلط من المحتاجين زاتهم
خسارتك يا حكومه ويا مسئولين
تخليتوا عن شعبكم فى اصعب الظروف
حسبى الله ونعم الوكيل



أستغفر الله العظيم بس الحاجة دي بتذكر الزول بالمثل المشهور ( الحسنة في ال..... زي الشرا في القندول ) الله المستعان الوضع صعب وربنا يعينهم وأنتو أن شاء الله في ميزان حسناتكم في الصحيحين من حديث ابن عمر -رضي الله عنه- عنهما عن النبي -صلى الله عليه وسلم- أنه قال:

(المسلم أخو المسلم لا يظلمه ولا يُسلمه، ومن كان في حاجة أخيه كان الله في حاجته، ومن فرَّج عن مسلم كربة فرَّج الله عنه بها كربة من كرب يوم القيامة، ومن ستر مسلماً ستره الله يوم القيامة)
نسأل الله أن يكون في حوائجكم كما كنتم في حاجتهم وأن ينفس كربكم في الدنيا ولآخرة وأن يستركم في الدارين وأن لا تروا مكروها في عزيز لديكم
__________________

إذا أعجبتك نفسك فانظر تحت حذائك فمن هذا التراب خُلقت
مستر جنو منو is offline               Reply With Quote